Ил Дархан Айсен Николаев Уһук Илин 2025 сыллаахха диэри сайдыытын национальнай бырагырааматын бырайыагын Судаарыстыбаннай сэбиэт президиумун мунньаҕар көмүскүөҕэ. Бырайык 2035 сылга диэри сайдыыны учуоттуур. Мунньаҕы бэрэсидьиэн Владимир Путин ыытыаҕа.
Тэрээһин Владивостокка Илиҥҥи экэнэмиичэскэй форум чэрчитинэн бүгүн ыытыллыаҕа. Мунньах «Якутия 24» уонна «НВК Саха» ханаалларга быһа эфиргэ көстүөҕэ. Саха сирин бириэмэтинэн 18.30 чааска саҕаланар.
«Балаҕан ыйын 4 күнүгэр Ил Дархан Айсен Николаев Судаарыстыбаннай сэбиэт мунньаҕар сүрүн спикерынан кыттыаҕа», — диэн Ил Дархан уонна бырабыыталыстыба пресс-сулууспатын иһитиннэриитигэр этиллэр.
Россия Судаарыстыбаннай сэбиэтин бэлэмниир оробуочай бөлөх салайааччытынан Айсен Николаев буолбут. Национальнай бырагыраама бырайыагар былаас бэрэстэбиитэллэрэ, уопсастыбаннай экспертэр, учуонайдар, Уһук Илин олохтоохторо этиилэрин киллэрбиттэр, санааларын эппиттэр.
Бу иннинэ РФ бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев биллэрбитинэн, ырытыыга 200 тыһыынчаттан тахса киһи кыттыбыт. Манна экэниэмикэ, медицина, суолу тутуу, үөрэҕирии, култуура, спорт сайдыытыгар этиилэр бары хомуллубуттар.
#саха_нких_сонуннара