Айсен Николаев Уһук Илин эдэр ыалларыгар ипэтиэкэ бырыһыанын аччатарга этии киллэриэҕэ

Саха сирин баһылыга Айсен Николаев Владимир Путиҥҥа Уһук Илиҥҥэ эдэр ыалларга ипэтиэкэҕэ бырыһыан ставкатын сыллааҕытын 2 бырыһыаҥҥа диэри аччатарга этии киллэриэҕэ. Кини Уһук Илин федеральнай уокуругун сайдыытын национальнай бырагырааматын барылын Судаарыстыбаннай Сэбиэккэ балаҕан ыйын 4 күнүгэр киллэриэҕэ. Бу туһунан Ил Дархан быһа эфирин кэмигэр иһитиннэрдэ.

“Владивостокка, балаҕан ыйын 4 күнүгэр, Госсэбиэккэ дойду бэрэсидьиэнигэр биһиги Уһук Илин сайдыытын национальнай бырагырааматыгар эдэр ыалларга бастакы усунуоһа суох ипэтиэкэни сыллааҕыта 2 бырыһыаҥҥа биэрэр туһунан этиини киллэрдибит, ону мин туруоруохтаахпын. Бу өрөбөлүүссүйэлии көҕүлээһин, манна оҕолоннохторуна кирэдьииттэри субсидиялааһыҥҥа сыһыаннаах пууннар бааллар. Биһигини судаарыстыба баһылыга өйүө диэн эрэнэбин уонна бу бырагыраама Уһук Илиҥҥэ 2025 сылга диэри уонна салгыы 2035 сылга диэри кэскиллээх ылыныллан, олоххо киириэҕэ”, — диэтэ Айсен Николаев.
Статистика чахчытынан, Уһук Илиҥҥэ уон алта тыһыынча кэриҥэ эдэр ыал дьиэҕэ-уокка наадыйар.

Дьулустаан Сергеев