Айсен Николаев Үөһээ Бүлүү оройуонун тыа хаһаайыстыбатын тэрилтэлэригэр сырытта
Саха сирин баһылыга Үөһээ Бүлүү оройуонун тыа хаһаайыстыбатын тэрилтэлэригэр сырытта.
Өрөспүүбүлүкэ баһылыга Айсен Николаев Үөһээ Бүлүү улууһугар сырыытын кэмигэр тыа хаһаайыстыбатын олохтоох тэрилтэлэригэр сырытта. Оройуон киинигэр Айсен Николаев үүтү астыыр сыаҕы чөлүгэр түһэрии боппуруоһун көрдө. Кэмбинээт моҥкуруут буолбут “Чолбон” тыа хаһаайыстыбатын кэпэрэтиибин оннугар тэриллибит “Үөһээ Бүлүү” тэрилтэ балаансатыгар турар. Хампаанньа үлэһиттэрэ этэллэринэн, сменаҕа 15 туоннаны астыыр собуокка сэпэрээтэр, холодильник уонна дизельнэй генератор курдук тэриллэр тиийбэттэриттэн толору кыаҕынан үлэлээбэт. Бүгүн манна 1,5 туонна үүт астанан, чөчөгөй, суорат, кефир уонна йогурт 5 көрүҥэ оҥоһуллан тахсар.
Айсен Николаев Ороһу сэлиэнньэтигэр сылдьан, олохтоох тыа хаһаайыстыбатын кэпэрэтиибин үлэтин билистэ. 120 төбөҕө аналлаах хотон 2016 сыллаахха тыа хаһаайыстыбатын кэпэрэтииптэрин өйүүр федеральнай бырагырааманан тутуллубут. Ааспыт сыллаахха “Сүөһү аһылыгын сайыннарыы” хос бырагыраама көмөтүнэн тэрилтэ сиилэс дьааматын уонна 2,5 км усталаах хорутуллар бааһына күрүөтүн туттубута. Хотоҥҥо 322 төбө сүөһү турар, ити иһигэр 91 ыанар ынах. Ааспыт сыл түмүгүнэн тыа хаһаайыстыбатын кэпэрэтиибэ 111 туонна үүтү туттарда.
Ороһуга өрөспүүбүлүкэ салайааччыта 142 төбө сүөһүлээх бааһынай хаһаайыстыбатын баһылыга Александр Тюляховтыын көрүстэ. Эдэр фермер хаһаайыстыбатын тэринэригэр өрөспүүбүлүкэ тыатын хаһаайыстыбатын министиэристибэтин граннара көмөлөспүттэрин аҕынна. 2017 сыллаахха кини урукку Исидор Барахов аатынан сопхуос быраҕыллыбыт хотонун чөлүгэр түһэрбит, тиэхиньикэ, сүөһү атыыласпыт, үлэнэн биир дойдулаахтарын хааччыйбыт. Маны сэргэ “Тыа хаһаайыстыбатын оҥорон таһаарыытын сайыннарыы” хос бырагыраамаҕа кыттан, 15 км күрүөнү туппут, 48 гектардаах сири чөлүгэр түһэрэн, онно сенажка анаан биир сыллаах оту ыспыт.
Ил Дархан саҕалаан эрэр фермергэ хаһаайыстыбатын тэрийиигэ ситиһиилэри баҕарда уонна кинини саха ыччатыгар холобур тутунна. Өрөспүүбүлүкэ бырабыыталыстыбата бааһынай хаһаайыстыбатыгар саҥа хотону тутууга өйүөҕэ диэн эрэннэрдэ.
“Өрөспүүбүлүкэҕэ саҥа бааһынай хаһаайыстыбалара тэриллэллэрэ үөрдэр, ордук эдэр ыччат тэринэрэ. Кинилэр ыччаты патриотизмҥа уонна үлэҕэ тапталга иитэллэр, онон кинилэри биһиги өйүөхтээхпит”, — диэтэ Айсен Николаев.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.