Айсен Николаев оройуон баһылыктара өрөспүүбүлүкэ стратегиятыттан хаалбаттарыгар эттэ
Саха сирин баһылыга оройуоннар уонна куораттар баһылыктарыттан өрөспүүбүлүкэ уопсай сайдыытыттан хаалбаттарыгар ирдээтэ. Кэпсэтии муниципальнай былааннар өрөспүүбүлүкэ 2050 сылга диэри тус сыаллаах көрүүлээх 2032 сылга диэри кэмҥэ олоххо-дьаһахха уонна экэниэмикэҕэ сайдыытын өрөспүүбүлүкэтээҕи стратегиятын кытта сөп түбэһиитигэр ананна, диэн СИА иһитиннэрэр.
Аркадий Васильев, СИА
СӨ Ил Дарханын олохтоох салайыныы сэбиэтин мунньаҕар Айсен Николаев муниципальнай сайдыы өрөспүүбүлүкэ стратегическай былааныттан туспа барар кыаҕа суоҕун бэлиэтээтэ.
“Эһиги өрөспүүбүлүкэтээҕи уонна федеральнай судаарыстыбаннай бырагыраамаларга уһун болдьохтоох былаана суох киирэргит кыаллыбат”, — диэн Ил Дархан сэрэттэ.
Былааннары синхронизациялааһын туһунан боппуруоһу Ил Дархан былырыын ахсынньыга туруорбута. Ол эрээри ыйыыны сорох муниципальнай оройуоннар толорботулар. Оннооҕор Абый улууһугар билиҥҥэ диэри тус стратегияларын оҥорор туһунан быһаарыыны ылыммакка олороллор.
Маныаха Айсен Николаев Абый улууһа “өрөспүүбүлүкэ сайдыытыттан хаалан иһэрин” бэлиэтээтэ.
“Аатыгар эрэ үлэлээн, бэҕэһээҥҥи күнүнэн олорор табыллыбат. Олохтоох салайыныы боппуруостарыгар департаментан кытаанах хонтуруолга ыларгытыгар, ирдэнэр буоллаҕына – көмөлөһөргүтүгэр көрдөһөбүн. Туох туһунан кэпсэтии барарын өйдөөбөт дьон баар буоллахтарына, маннык дьон өрөспүүбүлүкэ оройуоннарын салайаллара табыллыбат”, — диэн түмүктээтэ Саха сирин баһылыга.
Аркадий Васильев, СИА