Айсен Николаев Хэйлунцзян провинция губернаторын кытта көрүстэ

Бөлөххө киир:

Саха сирин дэлэгээссийэтэ Арассыыйа-Кытай VI  ЭКСПО-тыгар кыттыытын кэмигэр Саха сирин баһылыга Айсен Николаев  Хэйлунцзян провинция губернаторын тойон Ван Вэньтаоны кытта көрүстэ.

Көрсүһүүгэ өрүттэр уһун болдьоххо киэҥ өрүттээх сибээһи олохтуурга баҕаларын биллэрдилэр. Чуолаан, Айсен Николаев бииргэ үлэлээһиҥҥэ Эрэгийиэннэр икки ардыларынааҕы хамыыһыйаны тэрийэргэ этии киллэрдэ. Бу хамыыһыйа кыттыгас бырайыактары сүрүннүөхтээх уонна олоххо киллэриэхтээх. Саха сирин баһылыга  Хэйлунцзян губернаторыгар биир чопчу бырайыагы быһааран, кэлэр сыл бүтүөр диэри олоххо киллэрэргэ эттэ.

Ван Вэньтао Айсен Николаев этиитин өйөөтө уонна Арассыыйа-Кытай сыһыаннаһыыларын сайдыытын күөнүгэр Кытай эрэгийиэннэрэ бырабыыталыстыбаны уонна биисинэс эйгэтин кытта дьыалабыай сыһыаны олохтуурга бэлэмнэрин биллэрдэ.

Салгыы Айсен Николаев уонна Ван Вэньтао 2019-2022 сылларга Саха Өрөспүүбүлүкэтин уонна Хэйлунцзян провинциятын норуодунай бырабыыталыстыбатын икки ардыларыгар сөбүлэһиини олоххо киллэриигэ бииргэ үлэлээһин былааныгар илии баттастылар.

Кыттыгас үлэ былаана Арассыыйа уонна Кытай эрэгийиэннэригэр экэниэмикэ сайдыытыгар уонна гуманитарнай бииргэ үлэлээһиҥҥэ олук буолуоҕа.

Саха Өрөспүүбүлүкэтин Ил Дарханын уонна

Саха Өрөспүүбүлүкэтин Бырабыыталыстыбатын пресс-сулууспата.

+1
0
+1
0
+1
0
+1
0
+1
0
+1
0
+1
0