Ил Дархан Айсен Николаев «Россия24” ханаалга быһа эпииргэ тахсан, өрөспүүбүлүкэҕэ эпидемиологическай балаһыанньа туһунан кылгас интервью биэрдэ.
— Вакцинация хаамыыта, атын эрэгийиэннэргэ тэҥнээтэххэ, куһаҕана суохтук баран иһэр. Быһыы бастакы укуолун улахан дьон 77%, Дьокуускайга 80% ыллылар. Өссө 99% ылбыт оройуоннар бааллар.
— Улаатан эрэр оҕолорго быһыыны биэрии балаһыанньата хайдаҕый?
— Өрөспүүбүлүкэҕэ оҕолорго бэриллиэхтээх “Спутник М” быһыы баартыйата кэлэ илик. Миэхэ төрөппүттэр оҕолорбутугар быһыы биэриэхпитин баҕарабыт диэн этиилээх тахса сылдьыбыттара. Биллэн турар, бу баҕа өттүнэн оҥоһуллар дьыала. Быһыы кэллэҕинэ, боппуруоһу кэмигэр быһаарыахпыт. Оттон улахан дьоҥҥо быһыы ахсаана тиийэр.
Чуолкайдык биллэр, быһыыны ылбыт дьон ыарыыны чэпчэкитик аһарыналлар эбит. Билигин ИВЛ аппараатыгар сытар 10 киһи быһыыны ылбатахтар. Реанимацияҕа сытар 66 киһиттэн 2 киһи эрэ быһыыны ылбыт эбит.
— “Омикрон” штамм өрөспүүбүлүкэҕэ төһө тарҕанан эрэрий?
— Хомойуох иһин, кэнники күннэргэ түргэнник тарҕанан эрэр, ордук Дьокуускай куоракка. Ол эрээри, балыыһаҕа киирии эбиллибэтэ. Билигин биһиэхэ коронавируснай ыарыһахтарга 1300 куойка баарыттан, 900-һэ туолан турар. Ыксал буоллаҕына, 4,5 тыһыынча куойканы тэрийэр кыахтаахпыт.
Суһал ыстаап балаһыанньаны барытын күҥҥэ иккитэ хонтуруоллуу олорор, суһал миэрэлэри ылынар. Улуустар бэйэлэрэ суһаллык дьаһаналларыгар көҥүл бэриллибитэ. Холобур, дьуһуурунай бөлөхтөрү эрэ хаалларан баран, уһуйааннары да сабыахтарын сөп.
— Туох хааччахтыыр миэрэлэри ылынаҕытый?
— Саха сирэ олус улахан, онон түргэнник дьаһаннахпытына эрэ, табыллар. Дьокуускайга хааччахтыыр миэрэлэр өссө кытааппыттара. Үөрэнээччилэр (9-с, 11-с кылаастартан ураты) тэйиччиттэн үөрэххэ көспүттэрэ. Култуура тэрилтэлэригэр саалалар 50% эрэ туолаллар. Кылаабынай санитарнай быраас орто профессиональнай үөрэх тэрилтэлэрин эмиэ тэйиччиттэн үөрэххэ ыытарга этиилээх киирдэ.
Ангелина Васильева, “Саха сирэ” хаһыат, edersaas.ru