Саха сирин күндү олохтоохторо, эһигини судаарыстыбаннай бырааһынньыгынан – Арассыыйа күнүнэн эҕэрдэлиибин!
Бу бэлиэ даататтан Ийэ дойдубут аныгы устуоруйатын ааҕыы саҕаланар. 1990 сыл бэс ыйын 12 күнүгэр РСФСР дьокутааттарын бастакы сийиэһэ Арассыыйа Судаарыстыбаннай суверенитетын туһунан декларацияны ылыммыта. Манна Арассыыйа Конституциятын бас суолтата чопчуламмыта. Дойдубут Арассыыйа Федерациятынан ааттаммыта. 1992 сыллаахха бу күн Арассыыйа Бэрэсидьиэнин бастакы аһаҕас бүттүүн быыбара ыытыллыбыта.
Бу отучча сыл устата дойдубут уларыйыы-тэлэрийии нөҥүө ааста уонна салгыы иннин диэки сайдарыгар күүстээх буолла.
Арассыыйа күнэ Арассыыйа көҥүлүн уонна тутулуга суоҕун, бэйэлэрин Ийэ дойдуларын бары бииргэ туппут уонна көмүскээбит норуоттар биир историческай дьылҕалаахтарын туоһулуур. Элбэх омуктаах держава олохтоохторо буоларбытынан, үгүс үйэлээх устуоруйабытынан, баай эгэлгэ култуурабытынан, духуобунай үгэстэрбитинэн, наука ситиһиилэринэн, бүтүн аан дойдутааҕы нэһилиэстибэҕэ кылааппытынан киэн туттабыт. Киэн туттабыт дьонунан – киһи санаата тиийбэт чыпчаалларын ситиһэн, ийэ сир араас муннуктарыттан күүстээх утарсааччылар ортолоругар бастыҥ буолбут Аҕа дойдубутун аатырдар биир дойдулаахтарбытынан. Төрөөбүт ийэ сирин туһугар чиэһинэйдик уонна дьаныардаахтык үлэлиир, үлэтинэн, күүһүнэн уонна айар үлэтинэн бэйэтин тула олоҕу үтүө, сырдык, үчүгэй оҥорор дьону ытыктыыбыт уонна махтанабыт!
Саха сирэ Арассыыйа саамай улахан уонна аан дойдуга саамай киэҥ сирдээх-уоттаах дойду быһыытынан уопсай үлэҕэ-хамнаска бэйэтин дьоһун кылаатын киллэрэр. Саха Өрөспүүбүлүкэтигэр бөдөҥ инвестиционнай бырайыактар олоххо киирэллэр, социальнай эйгэ тиһиктээхтик сайдар, саҥа оҥорон таһаарыы, үрдүк технологиялаах үлэ миэстэтэ тэриллэллэр. Биһиэхэ кимиилээхтик сайдарбытыгар бары кыахтар толору бааллар. Оттон бары биир хамаанданан дьыалаҕа ылсыстахпытына, биһиэхэ барыта табыллар!
Бырааһынньыгынан, Арассыыйа күнүнэн, күндү Саха сирин олохтоохторо! Чэгиэн доруобуйаны, дьолу-соргуну уонна этэҥҥэ буолууну баҕарабын!
Айсен Николаев,
Саха Өрөспүүбүлүкэтин Ил Дархана.