Саха сирин баһылыга Айсен Николаев Иркутскайдааҕы ньиэп хампаанньатын дэлэгээссийэтин кытта көрүстэ
Ыам ыйын 29 күнүгэр Саха сирин баһылыга Айсен Николаев “Иркутскайдааҕы ньиэп хампаанньата” ХЭТ салалтатын кытта көрүстэ. Көрсүһүүгэ хампаанньаны төрүттээччи Николай Буйнов кытынна. Баһылык хампаанньа өрөспүүбүлүкэ хомунаалынай комплексын ньиэбинэн хааччыйарын иһин махтанна. “Ааспыт навигацияҕа үлэбит ситиһиилээхтик ааспытынан, биһиги хомунаалынай комплекспыт тэрилтэлэригэр ньиэби тиэрдии боппуруоһа салгыы этэҥҥэ быһаарыллыа диэн эрэнэбин”, — диэтэ Айсен Николаев.
Ил Дархан өрөспүүбүлүкэҕэ бырамыысыланнаска оҥорон таһаарыы кэнники биэс сылга үрдээбитин бэлиэтээтэ. “Саха сирэ дойду бүттүүнүн хостуур бырамыысыланнаһын хамсатааччынан буолар. Хас сыл ахсын биһиги кыһыл көмүһү, үрүҥ көмүһү, ньиэби, таас чоҕу хостооһуҥҥа рекордары ситиһэбит. Ньиэби хостооһун кыаҕын өссө үрдэтиэхпит. Бырамыысыланнаһы өйүүрбүтүнэн сибээстээн, “Иркутскайдааҕы ньиэп хампаанньата ньиэби хостооһуну улаатыннарыан уонна араас таһымнаах бүддьүөккэ нолуогу төлөөһүнү хааччыйыан сөп”, — диэтэ Айсен Николаев.
Регион баһылыга Саха сирин сиригэр-уотугар хостуур хампаанньалар айылҕа харыстабылын сокуоннаһын тутуһаллара ирдэнэрин санатта. Маныаха кини Иркутскайдааҕы ньиэп хампаанньата айылҕаҕа харыстабыллаахтык сыһыаннаһарын биһирээтэ.
Бу хампаанньа бөлөҕө Саха сиригэр 2012 сылтан үлэлиир, кэнники 6 сылга геологическай-чинчийэр үлэлэргэ инвестициялар 7,6 млрд солкуобайы куоһардылар. Хампаанньа регион сиригэр-уотугар гаас конденсаттаах 2 сири арыйда – Ылгычахтааҕы уонна Бүүктээҕи (Мииринэйгэ уонна Ленскэйгэ). Балар гаастарын уопсай саппаастара 66 млрд тахса куб.м. Холдинг лицензиялаах 7 учаастагы уонна 8 баайдаах сири туһананр кыахтаах.
Саха сирин баһылыга Иркутскайдааҕы ньиэп хампаанньатын Мииринэйгэ атырдьах ыйын 29-30 күннэригэр ыытыллар Ньиэп-гаас бастакы форумугар кытталларыгар ыҥырда.
Николай Буйнов салгыы бииргэ үлэлэһэргэ бэлэмин биллэрдэ.
Генеральнай дириэктэри солбуйааччы Евгений Милов түһэрсиллибит сөбүлэһиигэ олоҕуран, хампаанньа аҕа ууһун общиналарын уонна Таас Үрэх сэлиэнньэтин эбэҥкилэрин ассоциациятын кытта ыкса үлэлэһэллэрин бэлиэтээтэ.
“Саханефть” ХЭТ дириэктэрэ, Иркутскайдааҕы ньиэп хампаанньатын кылаабынай инженерин солбуйааччы Руслан Салихов Мииринэйгэ үлэлиир “Саханефть” көхтөөхтүк сайдарын-кэҥиирин эттэ.
Саха Өрөспүүбүлүкэтин Ил Дарханын уонна
Саха Өрөспүүбүлүкэтин Бырабыыталыстыбатын пресс-сулууспата.