Ил Дархан э.т. Айсен Николаев бырабыыталыстыба тутулун уларытар, судаарыстыбаннай былаас ситэриилээх уорганын үлэһиттэрин ахсаанын сарбыйар туһунан ыйааҕы таһаарда.
edersaas.ru
Өрөспүүбүлүкэ судаарыстыбаннай былааһын ситэриилээх уорганын тутулун тупсарарга туһуламмыт бу ыйааҕынан миниистирдэр кэбиниэттэрэ маннык састаабынан бигэргэннэ: бырабыыталыстыба бэрэссэдээтэлэ, бырабыыталыстыба бэрэссэдээтэлин үс солбуйааччы, уон аҕыс миниистир уонна түөрт судаарыстыбаннай кэмитиэт бэрэссэдээтэлэ.
Гражданскай уопсастыбаны сайыннарыы министиэристибэтэ, Атыылаһыы (закупка) эйгэтигэр хантараах ситимин бэрээдэктиир судаарыстыбаннай кэмитиэт, Судаарыстыба өттүттэн арыгы ырыынагын сааһылыыр управление, Бэйэтэ хаамар массыыналары уо.д.а. тиэхиньикэ туругун көрөр-истэр управление үлэлэрэ тохтотулунна.
Инвестиционнай сайдыы уонна предпринимательство министиэристибэтэ – Предпринимательство, эргиэн уонна туризм министиэристибэтигэр, Айылҕа харыстабылын министиэристибэтэ – Экология, айылҕаны туһаныы уонна ойуур хаһаайыстыбатын министиэристибэтигэр, ойуурга сыһыаннаһыы департаменын сыһыаран туран, Сибээс уонна информационнай технология министиэристибэтэ – Инновация, цифровой сайдыы уонна инфокоммуникационнай технологиялар министиэристибэлэригэр, Тыа хаһаайыстыбатын уонна ас-үөл бэлиитикэтин министиэристибэтэ — Тыа хаһаайыстыбатын министиэристибэтигэр, Тас сибээстэргэ департамент – Тас сибээстэргэ уонна норуоттар дьыалаларыгар министиэристибэҕэ уларытан тэрилиннилэр.
Итинэн судаарыстыбаннай былаас ситэриилээх уорганын 174 үлэһитэ, эбэтэр чунуобунньук 7,8 %-а сарбылынна, судаарыстыбаннай былаас ситэриилээх уорганын ахсаана отут биэстэн отукка диэри аччатылынна. Бу туһунан Ил Дархан уонна бырабыыталыстыба пресс-сулууспата иһитиннэрдэ.
Раиса Сибирякова, «Саха сирэ» edersaas.ru