Айсен Николаев 2035 сылга диэри Арктика сайдыытын бырайыагар анаммыт сессияҕа кытынна
Саха сирин баһылыга Айсен Николаев муус устар 12 күнүгэр Арассыыйа Арктикатааҕы түөлбэтин стратегическай сайдыытын бырайыагар анаммыт бастакы стратегическай сессияҕа кытынна. Сессияны Арассыыйа бырабыыталыстыбатын бэрэссэдээтэлин солбуйааччы – Арассыыйа бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев ыытта.
edersaas.ru
Дойду бэрэсидьиэнэ Владимир Путин 2020 сылга диэри Арассыыйа Федерациятын Арктикаҕа судаарыстыбаннай бэлиитикэтин төрүттэрин үлэтин түмүктүүрү учуоттаан 2035 сылга диэри Арассыыйа Арктикатааҕы түөлбэтин сайдыытын стратегиятын бырайыагын оҥорор наадатын туһунан федеральнай бырабыыталыстыбаҕа сорудах биэрбитэ. Докумуон быйыл ахсынньы 1 күнүгэр диэри бэлэм буолуохтаах.
Владимир Путин “Арктика – ыллыктаах кэпсэтии сирэ” форум кэмигэр тыл этэригэр бэлиэтээбитинэн, Арассыыйа Арктикатааҕы зонатын саҥа стратегията национальнай тосхоллор уонна судаарыстыбаннай бырагыраамалар тэрээһиннэрин, инфраструктурнай хампаанньалар инвестиционнай былааннарын, Арктика регионнарын уонна куораттарын сайдыытын бырагыраамаларын түмүөхтээх. “Арктика бары регионнарын социальнай-экэнэмиичэскэй көрдөрүүлэринэн, дьон олоҕун таһымынан Арассыыйа орто наһымыттан намыһах буолуо суохтаах”, — диэн соругу Владимир Путин туруорда.
Саха сирин баһылыга Айсен Николаев Арктика зонатын бырамыысыланнас баһылааһына дьон олоҕун таһымын үрдэтэр уонна ураты айылҕатын харыстыыр буоллаҕына ыытыллыахтаах диэн бэлиэтээтэ.
“Бырамыысыланнай сайдыы инфраструктураны сайыннарыахтаах, онно үлэлиир уонна олорор, улуу дойдуларын сирин-уотун харыстыыр дьон олоҕун тупсарыыга төһүү буолуохтаах. Экология, айылҕаны харыстабыллаахтык туһаныы, Хоту дойду аҕыйах ахсааннаах төрүт норуоттарын төрүт салааларын сайыннарыы боппуруостарын быһаарыахтаахпыт”, — диэтэ кини.
Былааммыт үгүс, диэн эбэн эттэ кини. Саха сирин баһылыга өрөспүүбүлүкэ судаарыстыбаннай былаас федеральнай уорганнарын быһаарыыларын кэтэспэккэ эрэ, бүгүн чопчу быһаарыылары ылыныаҕа диэтэ. Санатан эттэххэ, Айсен Николаев регионнааҕы бырабыыталыстыбаҕа өрөспүүбүлүкэ Арктика оройуонугар олорооччулары нолуоктан босхолуур туһунан сокуон барылын бэлэмнииргэ сорудах биэрбитэ. Муниципальнай тэриллиилэргэ дохуоттарын аччааһынын өрөспүүбүлүкэ бүддьүөтүн суотугар толуйарга сорудахтаабыта.
“Маны сэргэ дьоҕус уонна орто биисинэскэ нолуоктааһыны аччатар, дьон олоҕун тупсарар, төрүт салаалары өйүүр уонна экологияҕа хонтуруолу күүһүрдэр туһуттан бэйэбит этиилэрбитин киллэриэхпит”, — диэн Айсен Николаев бэлиэтээтэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин бырабыыталыстыбатын пресс-сулууспата