Айсен Николаев кэтэх уһуйааннарга административнай мэһэйдэри суох гынарга сорудахтаата
Саха сирин баһылыга Айсен Николаев муус устар 15 күнүгэр Саха сирин бырабыыталыстыбатын бэрэссэдээтэлин солбуйааччы Ольга Балабкина, үөрэх миниистирэ Владимир Егоров, урбаан миниистирэ Ирина Высоких уонна “Дети Якутии” тэрилтэ салайааччыта Валентина Старцева кыттыылаах Дьокуускай куорат чааһынай оҕо саадтарыгар аналлаах сүбэ мунньаҕы ыытта.
edersaas.ru
Саха сирин баһылыга, Дьокуускай кэтэх оҕо саадтарын салайааччыларыттан бу тэрилтэлэргэ былааны тас өттүнэн ыытыллар бэрэбиэркэлэр тустарынан сурук туппутун эттэ. Бу оҕо саадтарыгар сылдьыахтаах оҕолор испииһэктэрин “Дьокуускай куорат” үөрэҕин управлениета сөбө суоҕунан аахпыт. Маны тэҥэ, урбаанньыттар кэтэх оҕо саадтарыгар көрүллэр субсидиялар хойутаан түһэллэрин үҥсэргээбиттэр.
Айсен Николаев бу үөскээбит балаһыанньаны бэрдэ суоҕунан ааҕан туран, Дьокуускай баһылыгар уонна үөрэх миниистиригэр суһаллык быһааралларыгар сорудахтаата. Оҕолору кэтэх оҕо саадтарыгар миэстэнэн хааччыйар туһунан сөбүлэһии 2015 с. ылыныллыбыта. Ити кэмҥэ Дьокуускайга 3-тэн 7-гэр диэри саастаах оҕолору оскуола иннинээҕи тэрилтэнэн хааччыйыы уустук этэ. Бүгүн ити өттүгэр балаһыанньа чыҥха атын, онон сөбүлэһиини билиҥҥи балаһыанньаҕа олоҕуран хаттаан көрүөххэ наадатын өрөспүүбүлүкэ баһылыга бэлиэтээтэ.
Айсен Николаев урбаанньыттар үлэлэригэр административнай хааччахтааһыннары муҥутуурдук аччатарга эттэ. Өскөтүн 2012 сылга Дьокуускайга лицензиялаах биир эрэ оҕо саада баар буоллаҕына, билигин киин куоракка 39 кэтэх уһуйаан үлэлиир.
“Кэтэх оҕо саадтарын тула административнай хааччахтааһыннары суох оҥоруохха. Биисинэһи бэрэбиэркэнэн буулуур табыллыбат, төттөрүтүн бу боппуруостары салгыы быһаарыахха, ол иһигэр кэтэх уһуйааннарга дьааһыла бөлөҕүн арыйар туһунан”, — диэн түмүктээтэ Айсен Николаев.
Саха Өрөспүүбүлүкэтин Ил Дарханын уонна Саха Өрөспүүбүлүкэтин бырабыыталыстыбатын пресс-сулууспата