Айсен Николаев “Арассыыйа лидердэрэ” салайааччылар куонкурустарын кыайыылааҕа Евгений Григорьевтыын көрүстэ
Муус устар 3 күнүгэр Саха сирин Ил Дархана “Арассыыйа лидердэрэ” салайааччылар Бүтүн Арассыыйатааҕы куонкурустарын кыайыылааҕа, “АРТ” МУП генеральнай дириэктэрэ Евгений Григорьевы кытта көрүстэ.
Саха сирин баһылыга Евгений Григорьевы кыайыытынан эҕэрдэлээтэ уонна ситиһиилэри баҕарда. Ил Дархан “Арассыыйа лидердэрэ” Бүтүн Арассыыйатааҕы куонкуруһу ыытыы бастыҥ салайааччылары булууга, ону тэҥэ Арассыыйа регионнарыгар үрдүк идэтийбит таһымнаах салайар каадырдар саҥа тиһиктэрин үөскэтиигэ дьоһун суолталааҕын бэлиэтээтэ.
Евгений бу куонкуруска иккистээн кыттыбытын кэпсээтэ, былырыын, хомойуох иһин, бүтэһик биэтэккэ тиийбэтэҕэ: “Куонкурустарга кыттарбын сөбүлүүбүн, манна билиини уонна таһымы Арассыыйа бастыҥ лидердэрэ уонна экспердэрэ сыаналыыллар. Саҕалаабыт дьыалабын тиһэҕэр тиэрдэрбин сөбүлүүбүн, онон дойду 30 регионуттан 104 кыайыылаах ахсааныгар киирдим”.
Кини ону тэҥэ “Арассыыйа лидердэрэ” салайааччылар Бүтүн Арассыыйатааҕы куонкурустарын кыайыылааҕын быһыытынан биир мөлүйүөн солкуобай кээмэйдээх үөрэх гранын ылбытын эттэ. “Куонкурус кыайыылааҕын быһыытынан Арассыыйа Федерациятын сиригэр-уотугар лицензиялаах ханнык баҕарар үрдүк үөрэх кыһатын кытта дуогабар түһэрсэр кыахтанным. Мин М.В.Ломоносов аатынан Москватааҕы судаарыстыбаннай университекка үөрэнэр баҕалаахпын”, — диэн Евгений Григорьев бэлиэтээтэ.
Маны сэргэ куонкурус балаһыанньатын быһыытынан кыайыылаахтарга бөдөҥ хампаанньалар уонна биллэр судаарыстыбаннай деятеллэр топ-менеджердэрэ тус сүбэ-ама биэриэхтэрэ. Онон кыайыылаахтар тэрийээччилэр аадырыстарыгар 10 биллэр салайааччы уонна деятель аатын испииһэктээн биэрдилэр. Настаабынньыктар куонкурус кыайыылаахтарыттан кими талаллара 2019 сыл муус устар 15 күнүгэр биллиэҕэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.