Айсен Николаев Саха сиригэр Тыллары сайыннарыы сэбиэтин салайыаҕа
Саха сирин Ил Дархана Айсен Николаев Саха Өрөспүүбүлүкэтигэр Тыллары сайыннарыы сэбиэтин туһунан ыйаахха илии баттаата. Докумуонунан СӨ Ил Дарханын иһинэн Тыл бэлиитикэтин сэбиэтиттэн уларыта тутуллубут Сэбиэт саҥа балаһыанньата уонна састааба бигэргэннилэр.
edersaas.ru
Санатан эттэххэ, Өрөспүүбүлүкэ Төрүт сокуонунан Саха сирин сиригэр-уотугар судаарыстыбаннай тылларынан нуучча тыла уонна саха тыла (якутский) буолаллар. Хоту дойду аҕыйах ахсааннаах норуоттарын тыллара бу норуоттар түөлбэлээн олорор сирдэригэр дьиҥ таһымнааҕынан билиниллэллэр.
Өрөспүүбүлүкэ Ил Дарханын иһинэн Саха Өрөспүүбүлүкэтигэр Тыллары сайыннарыы сэбиэтэ Саха сирин судаарыстыбаннай уонна дьиҥ таһымнаах тылларын сайыннарыы, көмүскээһин уонна өйөбүл эйгэлэригэр судаарыстыба ыытар бэлиитикэтин ситэрэн-хоторон биэрэр аналлаах, бу тылларга наадыйыыны күүһүрдүөхтээх, балары туһаныы эйгэтин кэҥэтиэхтээх.
Сүбэлиир уонна сүрүннүүр уорган быһыытынан Сэбиэт судаарыстыбаннай былаас ситэриилээх уорганнарын, олохтоох салайыныы уорганнарын, уопсастыбаннай түмсүүлэри, наука, үөрэх уонна атын тэрилтэлэри Саха сирин духуобунай нэһилиэстибэтин тутаах чааһын быһыытынан норуоттар тылларын туһаныыга биир кэлим сыһыаны олохтуохтаах. Сэбиэт сүрүн соруктарыгар маны сэргэ киирэллэр – тыл култууратын тупсарыы, тыл эгэлгэтин харыстааһын, көмүскээһин уонна саҥарар култуураны сайыннарыы.
Саҥа уоргаҥҥа тыллары сайыннарыыга уонна харыстааһыҥҥа биллэр учуонайдар уонна эспиэрдэр киирдилэр, диэн өрөспүүбүлүкэ Ил Дарханын уонна бырабыыталыстыбатын пресс-сулууспата иһитиннэрэр.
“Тыл – норуот дууһата, тыл тыыннаах буоллаҕына – норуот эмиэ тыыннаах. Кэлэр көлүөнэлэргэ төрөөбүт тыл кэрэтин уонна сүмэтин хаалларыы – хас биирдиибит ытык иэһэ”, — диэн Айсен Николаев бэлиэтээтэ. Ил Дархан Сомоҕолоһуу сылыгар өрөспүүбүлүкэҕэ ыччат ортотугар төрөөбүт тылларга тапталы, ытыктабыллаах сыһыаны үөскэтэр соругу туруорда.
СИА.