Бүгүн Ил Дархан Айсен Николаев Үөһээ Бүлүү улууһугар сылдьан улуус социальнай эбийиэктэрин кэрийдэ, Бүлүү, Иирэлээх өрүстэрин туругун туһунан мунньаҕын ыытта.
Бастакынан Айсен Николаев улуустааҕы киин балыыһаҕа, 3-с нүөмэрдээх орто оскуола эбии тутуллан турар дьиэтигэр, 240 миэстэлээх оҕо саадыгар сырытта. Санатан эттэххэ, бу балыыһа 2016 с. үлэҕэ киирбитэ. Билигин биир сменаҕа 70 киһини көрөр, ону таһынан, 50 миэстэлээх стационардаах. Былырыыҥҥыттан ыла балыыһа инфоматтарынан, call-киини туһанан электроннай регистрацияны киллэрбиттэрэ.
3-с нүөмэрдээх орто оскуола саҥа дьиэтэ 140 миэстэлээх буолуохтаах. Тутуу былаан быһыытынан баран иһэр. Быйыл кыһын оскуола үлэҕэ киириэхтээх. Саҥа оҕо саадын тутуута эмиэ былаан быһыытынан баран иһэр. Билигин инженернэй коммуникацията, ититэр систиэмэтэ тардылла сылдьар. Бу бырайыак судаарыстыба уонна чааһынайдар бииргэ үлэлээһиннэринэн олоххо киириэхтээх.
Маны таһынан, Айсен Николаев Үөһээ Бүлүүтээҕи колледж саҥа мастарыскыайыан аһыллыытыгар сырытта. Санатан эттэххэ, колледжка 200 устудьуон үөрэнэр. Бу мастарыскыай массыыналары көрөр-үөрэтэр киин буолуохтаах. Үөрүүлээҕэ баар, тутууну улуус урбаанньыттара уонна колледж салалтата үбүлээн олоххо киллэрдилэр.
Ону сэргэ, Бүлүү, Иирэлээх өрүстэрин туһунан алмаас хостонор улуустарын баһылыктарын кытары мунньах ыытта. Мунньахха Айылҕа харыстабылын министиэристибэтэ, “АЛРОСА” хампаанньа кытыннылар.
Аграфена КУЗЬМИНА, “Саха сирэ” хаһыат.