Бүгүн, сэтинньи 26 күнүгэр, суһал ыстаап уочараттаах мунньаҕа ыытылынна. Ил Дархан Айсен Никоалев эрэгийиэҥҥэ коронавирус дьаҥын бохсууга соруктары ыйда.
Айсен Сергеевич бэлиэтииринэн, бүтэһик нэдиэлэҕэ оройуоннар эминэн хааччыллыылара тупсубут. Ол эрээри, хоту уонна Арктика оройуоннарын аптекаларыгар эмп син биир тиийбэт эбит. Маны сэргэ лабораторияларга анаалыһы оҥорууга соруктар тураллар. Айсен Николаев дойду Роспортебнадзора туруорбут соругун санатта. Ол курдук, биоматырыйаал лабораторияҕа киириэҕиттэн 48 чаас иһигэр түмүгэ быһаарыллыахтаах.
СӨ Доруобуйа харыстабылын миниистирэ Елена Борисова иһитиннэрбитинэн, билигин 113 ыарыһах ыарахан туруктаах, онтон 27 киһи ИВЛ-га, 86 киһи кислороднай эмтэниигэ холбонон сыталлар.
СӨ Роспотребнадзор управлениетын салайааччы Маргарита Игнатьева өрөспүүбүлүкэҕэ кириип утары вакцина бары баартыйата кэлбитин, улуустарга тиэрдиллэн эрэрин эттэ. Бүгүн үс авиарейсинэн Нерюнгрига, Өлөөҥҥө уонна Усуйаанаҕа тиийиэхтээх. Оттон сорох вакцианы сарсын Абыйга, Дьааҥыга ыытыахтара.
Дьокуускай тэрилтэлэригэр санитарнай-эпидемиологическай ирдэбиллэри тутуһууга бэрэбиэркэлэр тиһиктээхтик ыытыллаллар. Бэҕэһээ 104 элбэх кыбартыыралаах дьиэҕэ дезинфекция үлэтэ буолбут.
Айсен Николаев хааччахтыыр миэрэлэри уонна санитарнай-эпидемиологическай ирдэбиллэри тутустахха, чугаһынан кэмҥэ ыарыы аччыаҕа эттэ, итиэннэ холкутуйар эрдэтин санатта.
Ил Дархан уонна Бырабыыталыстыба пресс-сулууспата
Андрей Сорокин хаартыската.