Кыайыы

Айсен Николаев суһал ыстаабы кытта мунньахтаата



Бүгүн, сэтинньи 2 күнүгэр, Ил Дархан Айсен Николаев суһал ыстаабы кытта мунньахтаата. Айсен Сергеевич Дьокуускайга оҕо дьаҥҥа сутуллуута элбээбитин бэлиэтээтэ. Кини бу каникул саҕаламмытынан сибээстээҕин эттэ.

Маннык балаһыанньа атын нэһилиэнньэлээх пууннарга тарҕамматын туһуттан, Ил Дархан оройуон баһылыктарыгар сааһын ситэ илик оҕолор хааччахтыыр миэрэлэри тутуһалларын хонтуруоллуулларыгар соруйда.

Ил Дархан ыарахн туруктаах ыарыһах ахсаанын аччатыыга туох миэрэлэр ылыллыбыттарын сураста. Билигин эрэгийиэн реанимацияларыгар 111 киһи сытар, онтон 23 киһи ИВЛ-аппаракка, 88 киһи кислородка холбоммуттар. СӨ Доруобуйа харыстабылын миниистирэ Елена Борисова иһитиннэрбитинэн, Дьокуускайга сүбэлии диэн федеральнай эспиэрдэр кэлбиттэр, кинилэр ыарыһахтары эмтээһиҥҥэ бэлиэтээһин суоҕун эппиттэр. Бу күннэргэ миэдиктэргэ вебинардар саҕаламмыттар, итиэннэ 15 миэдик федеральнай эмтиир тэрилтэлэргэ стажировкаҕа барыахтара.

Елена Афраимовна Саха сиригэр суһал лиинийэҕэ эрийии биэс төгүл аччаабытын бэлиэтээтэ. Телемедиссиинэ көмөтүнэн күннэтэ 350 консультация оҥоһулларын уонна кириип, ОРВИ утары быһыы бу күннэргэ кэлиэхтээҕин туһунан миниистир иһитиннэрдэ.

Оттон өрөспүүбүлүкэ сүрүн санитарнай бырааһа Маргарита Игнатьева ааспыт нэдиэлэтээҕэр сутуллааччы ахсаана 4% аччаабытын, ол эрээри уопсай көрдөрүүгэ 6,7 % элбээбитин эттэ. Бүтэһик сууккаларга ордук элбэх киһи Алдаҥҥа, Анаабырга, Дьааҥыга, Кэбээйигэ, Өлөөҥҥө, Сунтаарга, Чурапчыга ыалдьыбыта бэлиэтэммит.

Дьокуускай баһылыга Сардаана Авксентьева ааспыт өрөбүллэргэ куорат сынньалаҥ кииннэригэр рейдэ үлэтэ күүһүрбүтүн иһитиннэрдэ. 29 эбийиэктэн сэттэтигэр кэһии баарын бэлиэтээбиттэр. Ааспыт үс күҥҥэ барыта 215 эбийиэк бэрэбиэркэлэммититтэн, 33 сиргэ санитарнай-эпидемиологическай нуорманы кэһии баарын учуоттаабыттар.

Оттон атын нэһилиэнньэлээх пууннарга бэрэбиэркэлэр туһунан ИДьМ миниистирин солбуйааччы Константин Неустроев иһитиннэрдэ. Ол курдук, барыта 2643 профилактическай кэпсэтии ыытыллыбыт: Мииринэйгэ — 416, Дьокуускайга — 390, Нерюнгрига — 102, Намҥа — 99, Алдаҥҥа — 94, Өлүөхүмэҕэ — 87, Ньурбаҕа, Хаҥаласка —60.

Ил Дархан уонна Бырабыыталыстыба пресс-сулууспата.

0
1

Санааҕын суруй