Бэҕэһээ Ил Дархан эбээһинэһин быстах кэмҥэ толорооччу Айсен Николаев Өлүөхүмэҕэ сырыытын кэмигэр куорат 50 миэстэлээх “Ёлочка” уһуйаанын арыллыытыгар кыттыыны ылла.
Уһуйааҥҥа үс бөлөх үлэлиэҕэ. Өлүөхүмэҕэ, Саха сирин ханнык баҕарар куоратыгар курдук, үөрэх тэрилтэлэригэр миэстэ тиийбэтин кыһалҕата турар. Ил Дархан эбээһинэһин толорооччу итини тоһоҕолоон бэлиэтээтэ. “1990-с сыллартан куоракка үөрэх тэрилтэлэригэр тутуу барбатах буолан, уһуйааҥҥа, оскуолаҕа миэстэ тиийбэтин кыһалҕата баар. Дьокуускай курдук саҥа дьиэлэр маҥнайгы мэндиэмэннэригэр оскуола иннинээҕи бөлөхтөрү арыйан саҕалаабыккыт. Туспа уһуйаан тутулларыгар бүддьүөттэн харчы көрүллэрин кэтэһэн олорбокко, бэйэҕит кыаххытынан кыһалҕаны быһаарарга туруммуккут. Үөрэҕи сайыннарыы, ордук оскуола иннинээҕи үөрэхтээһин, былаас инники турар соруктарыттан биирдэстэрэ”, — диэн эттэ.
Манна даҕаттахха, Айсен Николаев үөрэх тэрилтэлэриттэн өссө Өлүөхүмэтээҕи тиэхиньикум үөрэтэр куорпуһун көрдө. Олоҕу кытта тэҥҥэ хардыылаан, тиэхиньикумҥа былырыыҥҥыттан урукку идэлэригэр эбии ньиэп, гаас үлэһиттэрин бэлэмнииллэр. Быйылгыттан Нерюнгритээҕи медицинэ кэллиэһин филиала арыллан, сиэстэрэлэри үөрэтэн эрэллэр. Онон сыыйа кэҥээн иһэллэр.
Дириэктэр Сергей Сектяев тиэхиньикумҥа 20-чэ сыл устата хапытаалынай өрөмүөн ыытыллыбатаҕын эттэ. Быйыл материальнай-тиэхиньиичэскэй баазаны хаҥатыы бырагырааматынан федеральнай хааһынаттан 36 мөл. солк. ылары ситиспиттэр. Үөрэх тэрилтэтэ аныгы үйэҕэ эппиэттиирин курдук өрөмүөн үлэтин ыытыахтарын баҕаралларын иһитиннэрдэ. Ил Дархан эбээһинэһин толорооччуну кытта барсыбыт бөлөх “Эврика” гимназияны көрдө-иһиттэ.
Людмила ПОПОВА, “Саха сирэ” хаһыат, edersaas.ru