Ил Дархан Нерюнгрига оробуочай сырыытын чэрчитинэн бүгүн, алтынньы 22 күнүгэр, Нерюнгритааҕы киин балыыһа мэдиссиинискэй тэрилинэн хааччыллыытын көрдө-иһиттэ.
edersaas.ru
“Сүрэх, тымыр ыарыытын утары охсуһуу” федеральнай бырайыагынан 2020 сылга Нерюнгритааҕы киин балыыһа ангиографическай комплексынан уонна магнитно-резонанснай томографынан хааччыллар.
Маны таһынан, быйыл Арассыыйа Бырабыыталыстыбатын эрэсиэрбэлээх пуондатын үбүгэр коронавируһу утары охсуһарга ыраахтан олорон салайыллар рентгенодиагностическай комплекс, тыҥаны хачайдыыр аппарат, кислородунан хааччыйар систиэмэни уо.д.а. медицинскэй тэрили ылбыттар.
Айсен Николаев магнитно-резонанснай томограф турар сирин көрдө. МРТ аппаратын оннун булларыы балаҕан ыйын бүтүүтэ саҕаламмыта. Алтынньы бүтүүтэ силигин ситиэ диэн үлэһиттэр иһитиннэрдилэр.
Нерюнгритааҕы киин балыыһаҕа рентген кабинет өрөмүөнэ бүппүт. Маны сэргэ, ангиографический комплекс туруохтаан сирин хапытаалынай өрөмүөнэ бара турар. Билиҥҥи туругунан, муостатын тэлгии, быыстары оҥортуу, инженернэй ситимнэри тарда сылдьаллар. Кэлэр нэдиэлэттэн вентиляция систиэмэтин оҥорон саҕалыахтара.
Өрөспүүбүлүкэ салайааччыта балыыһаны кэрийэн көрөн, үлэни-хамнаһы билсэн баран, олохтоохтор сыл бүтүүтэ МРТ-га түһэр кыахтаналларын гына, өрөмүөнү хаачыстыбалаахтык уонна болдьоммут кэмигэр түмүктүүргэ диэн эттэ.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспатын матырыйаалыттан Ирина Ханды бэлэмнээтэ.
Хаартыска: Андрей Сорокин