Күндү Саха сирин ийэлэрэ!
Эһигини ис сүрэхпиттэн кэрэ бырааһынньыгынан – Саха Өрөспүүбүлүкэтигэр Ийэ күнүнэн эҕэрдэлиибин!
Ийэ – бу саамай күүстээх уонна истиҥ иэйиини кытта быстыспат сибээстээх күндү тыл. Күн сирин көрүөхпүтүттэн ийэбит биһиэхэ олох күүһүн иҥэрэр, таптаан, атаахтатан, көрөр-истэр, инники олохпутун түстүүр уонна киһилии сиэрдээх гына иитэн таһаарар.
Ол иһин ханнык да кэмнэргэ уопсастыба сайдыытыгар ийэ оруола сүҥкэн.
Бүгүн Арассыыйа Федерациятыгар ийэ буолууну уонна оҕо сааһы өйөөһүҥҥэ улахан болҕомто ууруллар. Биһиги судаарыстыбабыт тумус тутуллар соруктарыттан биирдэстэринэн оҕолор этэҥҥэ төрүүллэригэр уонна иитиигэ табыгастаах усулуобуйаны тэрийии буолар. Ийэлэргэ социальнай мэктиэлээһиннэри бөҕөргөтүүгэ дьайыылаах уонна көдьүүстээх миэрэлэр ылыллаллар, материальнай өйөбүл кэрискэтэ кэҥиир.
Биһиги дойдубутугар төрөппүт тапталыттан араас биричиинэлэринэн маппыт оҕолорго дьиэ кэргэннэрин уонна ийэлэрин булалларыгар тус сыаллаах үлэ ыытыллара дьоһун суолталаах.
Саха Өрөспүүбүлүкэтигэр ийэ буолууну уонна оҕо сааһы харыстааһыҥҥа, эдэр уонна элбэх оҕолоох ыаллары өйөөһүҥҥэ куруук улахан суолта бэриллэр. Оҕолоох ыаллар олохторун-дьаһахтарын уонна экэниэмикэлэрин өйөөһүҥҥэ, демографическай балаһыанньаны тупсарыыга, дьиэ кэргэн аатын-суолун уонна ыал сыаннастарын үрдэтиигэ кэлимсэ миэрэлэр ылыныллаллар. Саха сиригэр дьыссааттары, оскуолалары, доруобуйа харыстабылын эбийиэктэрин, успуорт уонна сынньалаҥ тэрилтэлэрин тутуу көхтөөхтүк ыытыллар.
Күндү Саха сирин ийэлэрэ! Бу кэрэ күн эһиэхэ тапталгыт уонна кыһамньыгыт, улахан уонна киһи хараҕар көстүбэт сыралаах үлэҕит – дьоһун гражданнары иитэн таһаараргыт, алаһа дьиэҕитин киһи кута-сүрэ тохтуур гына тупсаҕайдык тэрийэргит, эһиги тапталгытынан угуттанан олохпут устатын тухары биһиги сүрэхпитигэр умайар тапталгыт иһин махтанабын! Бука барыгытыгар чэгиэн доруобуйаны, дьолу-соргуну уонна нус-хас олоҕу баҕарабын! Эһиги дьиэ кэргэҥҥитигэр таптал уонна өйдөһүү олохсуйдун, оҕолоргут уонна чугас дьоҥҥут куруук аттыгытыгар буоллуннар уонна ситиһиилэринэн үөртүннэр!
Саха сирин баһылыга Айсен Николаев.