Айсен Николаев Дьокуускай кылаабынай быраастарын кытта мунньахтаата

Бөлөххө киир:

Саха сирин Ил Дархана Айсен Николаев «Инстаграмыгар» суруйбутунан, өрөспүүбүлүкэбитигэр коронавирус дьаҥын бохсуу миэрэлэрэ күүһүрэн, аны мантан инньэ анаалыс түмүгэ кэлэрэ түргэтиэҕэ.

Эрэгийиэҥҥэ ыарыы иккис долгуна кэлэн, Ил Дархан аатыгар колл-кииннэр, «суһал көмө», КТ-кабинеттар үлэлэрин, уочарат уонна анаалыс туттарыытын туһунан олус элбэх сурук киирэр. Бу уонна да атын боппуруостары Айсен Сергеевич Дьокуускай мэдиссиинискэй тэрилтэлэрин салайааччыларын кытта дьүүллэстэ.

«Биһиги дьонтон киирбит этиилэри барытын болҕойон үөрэттибит. Онтон сороҕо номнуо быһаарылынна. КТ-кабинет үлэтин кыраапыга чуолкайданна. ИФА уонна ИХА анаалыстарын ПЦР-анаалыс курдук түмүктээҕинэн ааҕар көҥүллэннэ. Бу быһаарыныы ПЦР-лаборатория үлэтин 30-35 % аччатыаҕа«, — диэн Ил Дархан эттэ.

Дьокуускайга бу күннэргэ эбии 100 куойка тэриллиэҕэ. Бу, бастатан туран, ыарахан туруктаах ыарыһахтарга ананыаҕа.

ПЦР-лаборатория үлэтэ күүһүрүөҕэ, анаалыс түмүгүн 3-4 күнүнэн билэр буолуохпут. Билигин Өрөспүүбүлүкэтээҕи клиническэй балыыһаны уонна Гериатрическай киини кислород хачайдыыр тэриллэринэн хааччыйыы быһаарыллар.

«Ыарыы өр буола кэллэ. Онон олох саҥа уобараһыгар олорорго үөрэниэхпитин наада. Пандемия саҕаланыаҕыттан миэдиктэр туох баалларынан үлэлииллэр. Күннэтэ, чаас аайы бэйэлэрин доруобуйаларын толук ууран туран, идэлэригэр бэриниилээхтик дьон туһугар үлэлии-хамныы сылдьаллар. Кинилэргэ биһиги өйөбүлбүт олус наада», — диэн Ил Дархан өрөспүүбүлүкэ олохтоохторугар туһаайар.

Билигин Саха сирин хас биирдии олохтооҕо бэйэтин уонна тулалыыр дьонун доруобуйаларыгар эппиэтинэһи сүгэрин билиэхтээх. Дьаҥ утары туох баар миэрэлэри, нуормалары тутуһан, бары бииргэ туруулаһыахпытын наада. Оччотугар эрэ вируһу кыайыахпыт диэн Айсен Николаев бэлиэтиир.

https://www.instagram.com/p/CGYj8Q7p60A/

edersaas.ru

+1
0
+1
0
+1
0
+1
0
+1
0
+1
0
+1
0