Бүгүн, балаҕан ыйын 28 күнүгэр, 12:00 чааска Саха сирин Ил Дархана Айсен Николаев эрэгийиэҥҥэ коронавирус балаһыанньатын туһунан брифинг ыытта. Суһал ыстаап Ил Дархан салайааччылаах салгыы үлэлиирин иһитиннэрдэ.
edersaas.ru
Ил Дархан Айсен Николаев:
— Хомойуох иһин, дойду да үрдүнэн да, өрөспүүбүлүкэҕэ да ыалдьыбыт дьон ахсаана элбии турар. Ол эрдэттэн сабаҕаламмытын курдук, дьон уоппускаттан кэлэн, үлэ-үөрэх дьыла саҕаламмытыттан уонна, биллэн турар, дьон сэрэҕэ суох буолуутуттан тутулуктаах. Ол түмүгэр, бүгүҥҥү күҥҥэ өрөспүүбүлүкэ үрдүнэн, 87 киһи коронавируһунан ыарыйда. Олортон, 45 биэс киһи Дьокуускайтан, уон – Уус Алдан, алта – Мэҥэ Хаҥалас уо.д.а. улуустарга иккилии-үстүү киһи дьаҥҥа сутулунна.
Аҕам саастаах дьон ыалдьара олус элбээтэ. Ол түмүгэр, биэс уон киһи реанимацияҕа сытар, олортон тоҕуһа ИВЛ аппаратынан тыыналлар. Пандемия саҕаланыаҕыттан, өрөспүүбүлүкэҕэ номнуо сүүс киһи тыына быһынна.
Бэйэни салайыныы уорганнара ылынар хааччахтара, мин санаабар, аҕыйахтар уонна толоруллубаттар. Хас биирдии уопсастыбаннай дьиэҕэ киирэргэ хайаан да температураны мээрэйдиэхтээхтэр, дезинфекция ыытыллыахтаах. Ону таһынан, 65-тэн үөһэ саастаах дьон үлэҕэ кыттыһыа суохтаахтар. Бу дьаһал мэдиссиинискэй үлэһиттэргэ эрэ туһуламмат.
Ис дьыала министиэристибэтин кытары маассабай-култуурунай тэрээһиннэри ыытар дьону эппиэтинэскэ тардыахпыт. Киинэ тыйаатырдара, мусуойдар, успуорт эбийиэктэрэ дьон тоҕуоруһар сирэ буоллун диэн көҥүллэммэтэҕэ. Санитарнай нуормалары тутуһаргыт булгуччулаах.
edersaas.ru