Ил Дархан э.т. Айсен Николаев бүгүн Өлүөхүмэ улууһугар сылдьан, тыа хаһаайыстыбатын эбийиэктэрин көрдө уонна тыа хаһаайыстыбатын бородууксуйатын оҥорон таһаарыы сайдыытыгар мунньах ыытта.
Күн бастакы аҥаарыгар Үҥкүр сэлиэнньэтигэр сылдьан, “Өлүөхүмэ кыладабыайа” ХЭТ хаһаайыстыбатын көрдө. Билигин хаһаайыстыба 940 төбө сүөһүнү, ол иһигэр 320 ыанар ынаҕы көрөн олорор. Сүөһү аһылыгын хааччыйыыга күүскэ ылсан эрэр. Быйыл “Поиск” хаһаайыстыба бааһыналарыттан 1 гектар сиртэн 20 центнэр туораахтаах бурдугу хомуйар санаалаах.
Салгыы тыа хаһаайыстыбатын бородууксуйатын оҥорон таһаарыыга уонна батарыыга мунньах буолла. Манна улууска тыа хаһаайыстыбатын сайыннарыы туһунан кэпсэттилэр. “Өрөспүүбүлүкэ билигин тыа хаһаайыстыбатын бородууксуйатын оҥорон таһаарыыга уонна ону батарыыга усулуобуйаны тэрийиигэ үлэлиир. Тыа хаһаайыстыбабыт сайдан иһиэхтээх. Хаачыстыбаны таһынан, билигин бородууксуйаны элбэтии боппуруоһа турар”, — диир Айсен Николаев. Өлүөхүмэ улууһугар тыа хаһаайыстыбатын сайдыытыгар үчүгэй олуктааҕын, усулуобуйалааҕын бэлиэтиир.
Ону таһынан, кини Саха сиригэр үлэлиир улахан хампаанньалар олохтоох хаһаайыстыбалартан бородууксуйаны атыылаһан ылар баҕалаахтарын иһитиннэрэр. Онуоха сылы эргиччи бородууксуйанан хааччыйыы баар буолуохтааҕын этэр.
Мунньахха итини сэргэ тырааныспар, суол-иис боппуруостарын, бородууксуйаны таһыы туһунан кэпсэттилэр. Бу боппуруостарынан СӨ бырабыыталыстыбата дьарыктаныаҕа.
Аграфена КУЗЬМИНА, edersaas.ru