Айсен Николаев: «Кэбээйиттэн Дьокуускайга диэри сылы быһа быыстала суох айанныыр суол арыллыаҕа»
Бүгүн “Саха” НКИХ ханаалынан өрөспүүбүлүкэ Ил Дархана Айсен Николаев атырдьах ыйынааҕы түмүгү таһаарда. Ил Дархан эрэгийиэҥҥэ ойуур баһаарын уонна суол-иис кыһалҕаларын туһунан кэпсээтэ.
«Быйыл куйаас уонна кураан сайын буолан кэккэ уустуктары үөскэттэ. Ойуур баһаара нэһилиэнньэлээх пууннарга кутталы үөскэтэ сырытта. Тустаах үлэһиттэр, тэрилтэлэр, олохтоохтор көмөлөрүнэн уот бохсуллан истэ. Уот ылбыт сирин иэнэ олус элбэх. РФ бэрэсидьиэнин таһымнаах быһаарыныылар олуһун көмөлөстүлэр — эбии үп көрүллүбүтэ. Биһиги сүрүн сорукпутунан нэһилинньэлээх пууннарга куттал суоһаабатын ситиһии этэ. Ол сорукпутун ситистибит.
Быйыл 180 км эрэгийиэннэҕи суол, 23 км киин куорат суола өрөмүөннэнэр. Суолу оҥорууга улахан хаалыы суох, үлэ былаан быһыытынан баран иһэр. Суолу оҥоруу национальнай бырайыак өрөспүүбүлүкэбитигэр биир улахан бырайыагынан буолар.
30 сыл устата оҥоһуллубут Кэбээйи суола былырыын-быйыл тутуллан, алтынньыга-сэтинньигэ арыллыаҕа. Кэбээйииттэн Дьокуускайга диэри сылы быһа быыстала суох айанныыр суол баар буолуоҕа. Маннык тэтими ыһыктыбаакка өссө атын суоллары оҥорорго дьулуһабыт.
Тэрээһин үлэтэ уонна бэдэрээтчиттэр үлэлэрэ мөлтөх буолан, Дьокуускай суолугар кыра хаалыылар бааллар этэ. Билигин бырабыыталыстыба уонна куорат дьаһалтата бииргэ үлэлээннэр быһыы-майгы көнөн эрэр», — диэн Ил Дархан Айсен Николаев атырдьах ыйын түмүктэрин кэпсээтэ.
edersaas.ru
Хаартыска — СИА.