Айсен Николаев уонна Иван Павлов Муома оройуонун сайдыытын дьүүллэстилэр
Өрөспүүбүлүкэ баһылыга Айсен Николаев атырдьах ыйын 12 күнүгэр Муома оройуонун баһылыга Иван Павловы кытта көрүстэ. Кинилэр оройуон социальнай-экэнэмиичэскэй сайдыытын дьүүллэстилэр.
Иван Павлов ойуур баһаардарын балаһыанньатын билиһиннэрдэ уонна Ил Дархаҥҥа итини умулларыыга көмөтүн иһин махтанна. Кини этэринэн, өрөспүүбүлүкэ суһал штабын быһаарыытынан Муома оройуонугар ойуурга турбут 5 улахан баһаар умулларыллыбыта. “Умулларыыга Арассыыйа ЫБММ, ойуур хаһаайыстыбатын бэрэстэбиитэллэрэ, олохтоохтор кыттыбыттара. Улахан көмөнү Арассыыйа ЫБМ авиацията оҥорбута, — диэтэ Иван Петрович.
Айсен Николаев оройуоҥҥа сүөһү аһылыгын бэлэмнээһин хайдах ыытылларын интэриэһиргээтэ. Былааннаммыт 1290 туонна оттон 902 туоннаны кэбистилэр, өрөспүүбүлүкэ үрдүнэн оройуон былааны толоруунан 6-с миэстэҕэ иһэр. “Ойуур баһаардарыттан сылтаан оттооһун тохтуу сылдьыбыта. Өрөспүүбүлүкэ тыа хаһаайыстыбатын министиэристибэтин нөҥүө мобильнай биригээдэлэри тэрийиигэ үлэлиибит, хаалбыт кэмҥэ былааны 80-85% толоруохпут”, — диэн эрэллээх кини.
Муома оройуона – коронавирус дьаҥа кэлбэтэх аҕыйах оройуоннарыттан биирдэстэрэ. Павлов оройуоҥҥа эпидемиологическай балаһыанньа ураты хонтуруолга тутулларын эттэ, манна кэлбит дьон бэрэбиэркэни ааһаллар, кинилэргэ дьиэҕэ олорууга сүбэлииллэр. Оттон дойду атын эрэгийиэннэриттэн кэлээччилэр учуокка тураллар уонна оройуон суһал штабын хонтуруолугар киирэллэр.
Көрсүһүүгэ оройуон баһылыга Муома оройуонугар тыа уотун бохсууга анал тиэхиньикэни, булууктары уо.д.а биэрэллэригэр көрдөстө. Сылы эргиччи нэһилиэнньэҕэ куттал суох буолуутун хааччыйыыга, дьон көһө сылдьар кэмигэр ыксаллаах балаһыанньалар тахсалларын туоратыыга Хонуу сэлиэнньэтигэр кииннээн көрдүүр-быыһыыр сулууспаны тэрийиини ааттаата.
Көрсүһүүгэ Иван Петрович өрөспүүбүлүкэ баһылыгын Арктика сирин-уотун сайыннарыыга ыытар үлэтигэр махтанна, чуолаан, Табаһыт күнүн олохтооһун туһунан ыйаах иһин. Кини бу көҕүлээһин хоту дойду олохтоохторун төрүт үгэстэрин, култуураларын, олохторун укулаатын харыстааһыҥҥа көмөлөһүөҕэ диэн эрэнэр.
Саха Өрөспүүбүлүкэтин Ил Дарханын уонна
Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни СТРЮКОВА.