Айсен Николаев Марат Хуснуллинныын Өлүөнэ муостатын тутуутун туһунан кэпсэттэ
Ил Дархан Айсен Николаев Москваҕа оробуочай сырыытын кэмигэр РФ бырабыыталыстыбатын бэрэссэдээтэлин солбуйааччы Марат Хуснуллинныын көрсүһүүтүн кэмигэр Өлүөнэ муостатын тутуу туһунан кэпсэттилэр.
edersaas.ru
Айсен Николаев өрөспүүбүлүкэҕэ сылы эргиччи айанныыр суол суоҕуттан, экономика сайдыытыгар харгыстары үөскэтэрин эттэ. Өлүөнэ өрүһү туоруур муоста тутуллуута федеральнай уонна региональнай суоллары, тимир суолу, аэропорду, өрүс пордун РФ суолун-ииһин кытары холбуохтаах. Ол түмүгэр 200 млрд солкуобай кэриҥэ инвестиция киириэхтээҕин таһынан, сыллата хотугу таһаҕаһы тиэйиигэ 4,1 млрд солкуобай кэриҥэ үбү кэмчилиэҕэ.
Олунньу ыйыгар СӨ бырабыыталыстыбата «Восьмая концессионная компания» ХЭТ кытары Өлүөнэ муостатын тутууга концессионнай сөбүлэһиигэ илии баттаспыта.
Өлүөнэ муостата 2024 сылга уонна инникитин 2034 сылга диэри Уһук Илин социальнай-экономическай сайдыытын национальнай бырагырааматын бырайыагар киллэриллибитэ. РФ аҕа баһылыгын ыйааҕынан национальнай бырагыраама 2020 сыл балаҕан ыйыгар бигэргэтиллиэхтээх.
edersaas.ru