РФ Төрүт Сокуонугар уларытыылары киллэриигэ куоластааһыҥҥа Саха сиригэр кэһии тахсыбата диэн Ил Дархан Айсен Николаев РИА-ҕа иһитиннэдэ.
«Эрэгийиэҥҥэ 820 быыбардыыр учаастак үлэлээтэ, маныаха исписэлиистэр суола-ииһэ суох сирдэринэн, обсерватордарынан, балыыһаларынан, дьиэлэринэн сылдьан куоластаттылар. Куоластааһыны ыытарга диэн 29 быстах кэмҥэ үлэлиир учаастак тэриллибитэ. Саамай уһук сирдэринэн Новосибирскай арыыларын архипелага, Котельнай арыы буоллулар, манна сэттэ киһи куоластаата», — диэн Айсен Николаев кэпсиир.
Кини иһитиннэрбитинэн, быыбардыыр хамыыһыйа сэттэ күн үлэлээбитин тухары Саха сиригэр олус куйаас күннэр турбуттар.
«Хас биирдии ыраах улууска, аҕыйах киһи олорор тэйиччи сирдэринэн хамыыһыйа чилиэннэрэ тиийэн үлэлээтилэр. Холобурдаан эттэххэ, Усуйаанаҕа хамыыһыйа үлэһиттэрэ муустаах үрэҕинэн тыыларын соһон, аһаҕас муоранан айаннаан олохтоохтору куоластаттылар. Сунтаарга алта киһи куоластыырын туһуттан, биэс чаас курдук уунан айаннаатылар, онтон сатыы 5 км тыанан хаамтылар», — диир Ил Дархан.
Кини эбэн этэринэн, куоластааһыны тэрийэргэ волонтердар уонна кэтээн көрөөччүлэр күүс-көмө буоллулар. Өрөспүүбүлүкэ үрдүнэн үс тыһыынчаттан тахса уопсастыбанньык кэтээн көрөөччү үлэлээтэ.
edersaas.ru