Айсен Николаев тыа хаһаайыстыбатын сайдыытын туһунан ыйаахха илии баттаата

Ааптар: 
Бөлөххө киир:

Ил Дархан Айсен Николаев иллэрээ күн “Саха Өрөспүүбүлүкэтигэр тыа хаһаайыстыбатын сайдыытын стратегическай хайысхаларын туһунан” ыйаахха илии баттаата.
edersaas.ru

Бу дьоһун ыйаахха 2024 сылга диэри биир сүрүн сорук чопчу ыйыллар: нэһилиэнньэни бэйэ оҥорон таһаарбыт хаачыстыбалаах аһынан-үөлүнэн хааччыйыы таһымын үрдэтии. Ол курдук, үүт уонна үүттэн оҥоһуллар ас-үөл 61 %, эт уонна эт бородууксуйата 30 %, хортуоппуй 66 %, оҕуруот аһа 51 %, сымыыт 65 % элбэтиллиэхтээх.
Өрөспүүбүлүкэ бырабыыталыстыбата тыа хаһаайыстыбатыгар туһаныллар сир иэнин 28 тыһ. гектарга тиэрдэн, нүөлсүтүллэр сир иэнин кэҥэтэн итиэннэ тыа хаһаайыстыбатын култуураларын  сиэмэлэринэн хааччыйыыны (бурдукка 18 %-тан 100 %-ҥа, хортуоппуйга 3 %-тан 16 %-ҥа, сүөһү сиир култууратыгар 2 %-тан 42 %-ҥа диэри) үрдэтэн, сиртэн үүнээйини ылыы таһымын үрдэтэри хааччыйарга сорудахтанна. Ходуһалары-бааһыналары бүтэйдээһиҥҥэ, үлэ тиэхиньикэтин атыылаһыыга улахан соруктар туруорулуннулар. Тыа хаһаайыстыбатын бородууксуйатын оҥоһуутун кээмэйин элбэтэргэ ходуһаны, мэччирэҥи, ол иһигэр нүөлсүтүллэр сирдэри көдьүүстээхтик туһанарга ыйылынна.
Сүөһү иитиитин салаатыгар ыытыллар үлэни-хамнаһы тупсарарга хас типовой сайылык, сылгы базата, сылгы собуота тутуллара, көтөрү иитии уонна сибиинньэ салааларын кииннэрин итиэннэ таба базатын саҥардыллара чопчу ыйылынна. Саха сүөһүтүн ахсаанын биир тыһыынчаҕа тиэрдэр, ыанар ынах искусственнай сиэмэлээһининэн хабыллыытын кэҥэтэргэ этилиннэ.
Иккис сүрүн хайысха быһыытынан олохтоох бородууксуйаны оҥорууну сайыннарыы ыйылынна. Ол курдук, үүтү уонна эти астыыр-үөллүүр тэрилтэлэр кыамталарын күүһүрдэр саҥа технология киллэриллиэхтээх. Балыктааһыны итиэннэ астааһыны сылга 6 тыһ. туоннаҕа тиэрдэн, бу салааны аныгы технологиянан сэбилиир сорук турда. Мүөтү уонна сир аһын бородууксуйатын оҥорууга эмиэ болҕомто уурулунна. Маны сэргэ батарыы ситимин тупсарыыны көҕүлүүр хайысхалар бэлиэтэннилэр.
Өрөспүүбүлүкэ баһылыга судаарыстыбаннай уонна олохтоох салайыныы уорганнарын өйөбүллэрин көдьүүһүн үрдэтиигэ, АПК-ны өйүүр пуонданы тэрийиигэ, хаһаайыстыбалар алтыһан үлэлииллэригэр итиэннэ салааҕа аныгы сыыппара технологиятын киллэриигэ ураты суолтаны уурда.

Раиса Сибирякова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0