Айхалга бөһүөлэги төрүттээччигэ аналлаах өйдөбүнньүк дуоска аһылынна
Мииринэй оройуонун Айхал бөһүөлэгэ төрүттэммитэ 60 сылын бэлиэтиир тэрээһиннэр чэрчилэринэн, 23 №-дээх орто оскуолаҕа бөһүөлэги төрүттээччи, «Айхал» рудник дириэктэрин 1-кы солбуйааччы Георгий Кадзовка анаан оҥоһуллубут дуосканы үөрүүлээх быһыыга-майгыга аһыы буолла.
«Георгий Александрович Кадзов Айхал бөһүөлэги төрүттээбит көлүөнэ дьонтон биирдэстэрэ буолар. Чахчы кини үтүө үлэтинэн, туруулаһыытынан дойду үрдүнэн алмааһы хостооһун киинэ үөскээбитэ. Айхал эдэр көлүөнэ дьоно-сэргэтэ бөһүөлэги олохтооччу аатын умнубата, кини туһунан өрүү ахтан-санаан ааһаллара махталлаах дьыала. Оскуола үөрэнээччилэрэ бөһүөлэги төрүттээччи Георгий Александрович Кадзов аатын чиэстээхтик сүгүөхтэрэ диэн эрэнэбит», – диэн Айсен Николаев эҕэрдэ тылы эттэ.
Санатар буоллахха, Георгий Кадзов 1937 сыллаахха оччотооҕу Комсомол сорудаҕынан, хотугу сир баайын туһаҕа таһаарыыга үлэлии кэлбитэ. Баара-суоҕа 23 саастаах эдэр уолу Магадааҥҥа «Ударник» көмүһү хостуур бириискэҕэ начаалынньыгынан анаабыттара. Салгыы «Айхал» руднигы салайбыта. Кини салайбыт кэлэктиибэ аҕыс ый иһинэн хайа-байытар фабриканы тутан үлэҕэ киллэрбитэ.
Өйдөбүнньүк дуосканы Ил Дархан Айсен Николаев, Айхаллааҕы хайа-байытар кэмбинээт дириэктэрэ Евгений Денисов уонна Г.А. Кадзов аатынан 23 №-дээх орто оскуола үөрэнээччитэ Марина Чирикова үөрэнээччилэр, алмаас бырамыысыланнаһын үлэһиттэрин, олохтоохтор ытыстарын тыаһынан доҕуһуоллатан астылар. Айхалга Георгий Александрович Кадзов аатынан уулусса баар, кини аатын 2020 сыллаахха 23 №-дээх орто оскуолаҕа иҥэрбиттэрэ.
Айсен Николаев оскуола үөрэнээччилэрин, учууталлары кытта көрсөн кэпсэттэ уонна «Точка Роста» сыыппара киинин үлэтин кытта билистэ. Кииҥҥэ 1-с-11-с кылаас үөрэнээччилэрэ аҕыс хайысхаҕа дьарыктаналлар. Билигин орто оскуолаҕа 920 оҕо үөрэнэр, кыһа барыта 100 медалиһы үөрэтэн таһаарбыт.
edersaas.ru