Бэҕэһээ, сэтинньи 8 күнүгэр, Мииринэй оройуонун Айхал бөһүөлэгэ төрүттэммитэ 60 сылын бэлиэтээтилэр. Ол сиэринэн, «Хотугу дьүкээбил» култуура дьиэтигэр бөһүөлэк үбүлүөйүн бэлиэтиир үтүөкэннээх тэрээһин буолла.
Үөрүүлээх тэрээһиҥҥэ Ил Дархан Айсен Николаев кытынна. Санатар буоллахха, 60 сыл анараа өттүгэр Саха сирин арҕаа сиригэр-уотугар геологическай-чинчийэр эспэдииссийэ алмаас баайдаах ураты сири, ону тэҥэ, Сохсолоох үрэххэ «Айхаллааҕы» кимберлитовай трубканы арыйбыта.
«60 сыл устата Айхал бырамыысыланнай бөһүөлэк буола улаатан, билигин аныгы олоххо толору эппиэттиир куорат буолла. Айхал Мииринэй оройуонун уонна өрөспүүбүлүкэ социальнай-экэнэмиичэскэй сайдыыларыгар сүрүн кылаатын киллэрэр. Бүгүҥҥү күҥҥэ «АЛРОСА» хампаанньа хостуур алмааһыттан 24 %-на Айхалтан ылыллар. Ол эрээри, Айхал сүрүн баайынан олохтоохтор буолаллар, кинилэр баар буолан, Айхал сайдар, тупсар, бөһүөлэк устуоруйата суруллар. Билиҥҥи эдэр көлүөнэ дьон бөһүөлэги өссө сайыннарыахтара диэн эрэнэбит», – диэн Айсен Сергеевич эттэ.
Үтүө тэрээһин кэмигэр Айсен Николаев бөһүөлэк сайдыытыгар үтүө суобастаахтык үлэлээбит дьоҥҥо судаарыстыбаннай наҕараадалары үөрүүлээх быһыыга-майгыга туттартаата.
Ол курдук, РФ Эниэргэтикэҕэ министиэристибэтин «Бочуоттаах шахтёр» диэн анал наҕараадатын Айхаллааҕы хайа-байытар кэмбинээтин машиниһа Леонид Александровка, Айхал баһылыга Галия Петровскаяҕа «Женские инициативы в развитии территории» марафон Дипломун, ону тэҥэ, 2021-2022 сылларга хаарбах дьиэттэн дьону көһөрүү бырагырааматын олоххо киллэрии чэрчитинэн, Дорожнай уонна Октябрьскай уулуссаларга турар 11 эргэ дьиэ ыстаарыстыларыгар сэртипикээттэри туттартаата.
Бу үтүөкэннээх тэрээһиҥҥэ Айхал бөһүөлэгин сайдыытыгар кылааттарын киллэрбит бырамыысыланнас бэтэрээннэрэ, өр сыл үлэлээбит салайааччылар кыттыыны ыллылар.