Сунтаар улууһун Күндэйэ нэһилиэгин Элгээн учаастагар кыһыннары-сайыннары хас да ыал олорор. Олортон биирдэстэрэ – Трофяновтар дьиэ кэргэн.
edersaas.ru
Дьиэ аҕа баһылыга Василий Алексеевич Трофянов, ийэлэрэ Татьяна Егоровна. Кинилэр икки оҕолоохтор. Уоллара ытык иэһин төлөөн аармыйаҕа сулууспалыы сылдьар. Онтон кыыстара үөрэҕин бүтэрэн, идэ ылла. Трофяновтар «Дьөһөгөй» диэн бааһынай хаһаайыстыбалаахтар. Бу күннэргэ ынахтара төрөөн, үрүҥ илгэни үрүйэлии сүүрдэллэр. Онон биллэн турар, түбүк, үлэ элбэх. Хата, сиэннэр, сиэн бырааттар, балыстар, аймах-билэ дьон кэлэн, илии-атах буолаллар, ыалдьыттыы кэлбиппит диэн даххаһыйан олорботтор.
Ол курдук, бу күннэргэ Татьяна Егоровна бииргэ төрөөбүт балтын сиэнэ биэс саастаах Айхал Слепцов Сунтаартан тахсан илии-атах, туһа киһитэ буола сылдьар. Биэстээх сиэн быраат күнүн аҥардас оонньууга бараабат. Дьонугар улахан көмө киһитэ. Эдьиийигэр ньирэй аһатан көмөлөһөр, ол быыһыгар тэлгэһэни да харбаан көрөр, ынахтары да «һайдыыр» саҥата учаастагы ылан кэбиһэр. Быыһыгар дьарыктанан, уруһуйдуур, суоттуур, буукуба үөрэтэр, хоһоону, ырыаны да элбэҕи биллэ.
СӨ Тыа хаһаайыстыбатын министиэристибэтин пресс-сулууспата