Быйыл М.К. Аммосов аатынан Хотугулуу-Илиҥҥи федеральнай университет устудьуоннарын ортотугар саха норуодунай бэйиэтэ Бүөтүр Тобуруокап төрөөбүтэ 100 сылыгар аналлаах “Айхал сахам тылыгар!” диэн хоһоон ааҕыыга күрэх үрдүк таһымнаахтык ыытылынна. Күрэҕи саха литературатын кафедрата уонна университет Научнай библиотеката тэрийдилэр.
edersaas.ru
Күрэх бастакы түһүмэҕэ бэйиэт төрөөбүт күнүгэр алтынньы 25 күнүгэр буолбута. Манна университет араас факультеттарыттан, институттарыттан (ГРФ, ИЗФИР, ИЯКН СВ РФ, КИТ СВФУ, МИ, ФЛФ, ФТИ) барыта 40-ча устудьуон кыттыбыта. Бүөтүр Тобуруокап хоһооннорун сахалыы, нууччалыы тылынан уус-ураннык аахпыттара. Дьүүллүүр сүбэ 18 бастыҥ кыттааччыны иккис түһүмэххэ аһарбыта.
Иккис, түмүктүүр түһүмэх сэтинньи 10 күнүгэр буолла. Кыттааччылар олус бэлэмнэнэн кэлбиттэр: сахалыы мааны таҥас таҥныбыттар, тылларын-өстөрүн чочуйбуттар. Күрэх ыҥырыылаах ыалдьыттарынан бэйиэт кыыһа Любовь Петровна Тобуруокаба, Үөһээ Бүлүү улууһун киин библиотечнай ситимин дириэктэрэ Наталья Кирилловна Петрова, СӨ норуодунай артыыһа Зоя Петровна Багынанова буоллулар. Зоя Петровна Дьүүллүр сүбэ бэрэссэдээтэлинэн буолбута кыттааччылары ордук долгутта, эппиэтинэстэрин үрдэттэ. Түмүктүүр түһүмэххэ барыта 16 устудьуон кытынна.
Хоһоон түһүлгэтин литература кафедратын устудьуоннара Элеонора Егорова (ЛР-17), Афоня Руфов (ЛР-17), Анна Эверстова (ЛТ-17), Ньургустаана Дмитриева (ЛТ-17), Жанна Иванова (ЛР-16) ылбаҕай ырыаларынан киэргэттилэр. Маны таһынан, тэрийэр бөлөх устудьуоннара (ЛР-15) дьүүллүүр сүбэ үлэлиир кэмигэр кыттааччыларга уонна ыалдьыттарга бэйиэт олоҕор, айар үлэтигэр анаммыт викторинаны ыыттылар, лотерея оонньоттулар. Кыттааччылар, ыалдьыттар ХИФУ Научнай библиотеката бэлэмнээбит П.Н.Тобуруокап олоҕун, айар үлэтин сырдатар быыстапканы кэрэхсээн көрдүлэр. Викторина кыайыылааҕа, саамай элбэх сөптөөх хоруйу биэрбит литературнай салаа бастакы кууруһун устудьуона Артем Осипов (ЛР-17) күрэх спонсора «Лена» киинэ-тыйаатыр туруорбут бирииһин – саҥа тахсар киинэҕэ 2 билиэти – ылла. Оттон лотерея бириистэрэ – П.Н. Тобуруокап айымньыларын 1-кы тома уонна «Папирус» хампаанньаттан сертификат – «бааттаах тарбахтаах» устудьуоннарга тигистилэр.
Икки түһүмэхтээх хоһоон ааҕыытын түмүгэ маннык буолла:
Саха норуодунай бэйиэтэ Бүөтүр Тобуруокап төрөөбүтэ 100 сылыгар аналлаах “Айхал сахам тылыгар!” диэн университет үрдүнэн ыытыллар хоһоон ааҕыытын күрэҕин кыайыылааҕынан Медицинскэй институт иккис кууруһун устудьуона Светлана Черкасова (МИ, ПО-16-201-2) буолла. Кыайыылаахха сүрүн бириис – Москва куоракка Ороһуоспатааҕы сынньалаҥҥа барар путевка – туттарылынна.
II миэстэҕэ магистрант Александр Гурьев (ИЯКН СВ РФ, М-СИТСЯ-17) уонна 1 куурус устудьуона София Гоголева (ИЯКН СВ РФ, ПО-МХК-17) таҕыстылар.
III миэстэни 3 куурус устудьуона Анна Аманатова (ИЯКН СВ РФ, БА-ЛР-15), 5 куурус устудьуона Сандал Павлов (ФЛФ) уонна 1 куурус устудьуона Дьулустаан Никаноров (ГРФ, БА-НД-17-2) ыллылар.
Анал ааттар маннык кыттааччыларга иҥэрилиннилэр:
«Кэскиллээх ааҕааччы» – Артем Осипов (ИЯКН СВ РФ, БА-ЛР-17);
«Хоһоонноохтук ааҕыы» – Мария Ефремова (ФТИ, 4 к.),
«Иэйиилээхтик ааҕыы» – Екатерина Ефимова (ФЛФ, 5 к.),
«Умсугутуулаах ааҕыы» – Алексей Филиппов (КИТ СВФУ, ПКС-17-1).
«Хомоҕой ааҕааччы» – Педагогическай үөрэхтээһин саха-кытай салаатын 2 кууруһун устудьуоннарын бөлөҕө.
Призердарга, номинаннарга тэрээһин спонсордарыттан сыаналаах бириистэр туттарылыннылар. Күрэх кыттааччылара бары туоһу суругунан бэлиэтэннилэр уонна поэт дьиэ кэргэнин аатыттан «Чабырҕах азбука» саҥарар кинигэни бэлэх ыллылар.
Түмүккэ саха литературатын кафедратын сэбиэдиссэйэ, филологическай наука хандьыдаата, дассыан В.Г. Семенова дьүүллүүр сүбэ бэрэссэдээтэлигэр, бары чилиэннэригэр, бэйиэт төрөөбүт улууһун баһылыгар В.С. Поскачиҥҥа, Үөһээ Бүлүү улууһу киин библиотечнай систиэмэтин дириэктэригэр Н.К. Петроваҕа уо.д.а. университет ректорын Е.И. Михайлова аатыттан махтал суруктары туттартаата, бары спонсордарга тэрийээччилэр ааттарыттан улахан махталын биллэрдэ. Бэйиэт кыыһа Л.П. Тобуруокаба аҕатын хоһооннорун университет атын факультеттарын, институттарын устудьуоннара ааҕалларыттан олус үөрбүтүн, онтон улаханнык долгуйбутун туһунан эттэ. Кини аҕатын туһунан кинигэлэри күрэҕи П. Тобуруокап “Этиий миэхэ эн биир тылла…” хоһоонугар суруллубут ырыанан арыйбыт 1 куурус устудьуонугар Элеонора Егороваҕа бэлэхтээтэ.
Екатерина Гладкина, ХИФУ устудьуона
Хаартыскаҕа түһэрии: Мария Атласова, ХИФУ устудьуона
«Ийэ тыл» пресс-киин