Ааспыт нэдиэлэҕэ, ахсынньы 23 күнүгэр, РФ Бэрэсидьиэнэ Владимир Путин үтүө үгүскэ кубулуйбут суруналыыстарга аналлаах пресс-кэмпириэнсийэтэ үрдүк таһымнаахтык буолан ааспыта. Бары эрэгийиэннэртэн 507 суруналыыс кыттыбыта.
Бу буолан ааспыт тэрээһин туһунан Саха сиринээҕи аҕалар лигаларын бэрэссэдээтэлэ, уопсастыбанньык Айхал Габышев санаатын маннык үллэһиннэ:
— Олохпут сиэринэн социальнай хайысхаҕа болҕомто ууруллуохтаах! Дьиэ кэргэн туруктаах буолуута – олохпут инникитэ!
Биһиги төрөөбүт дойдубут Бэрэсидьиэнэ уонна Бырабыытылыстыбата куруук аҕа уонна ийэ оруолун, оҕо иитиитин, чөл олоҕу, элбэх оҕолоох дьиэ кэргэни өрө тутарын үрдүктүк сыаналыыбыт. Оҕолор билиилэрин-көрүүлэрин таһыма төрөппүттэринээҕэр быдан ордук буолан иһэрэ чахчы диэн РФ Бэрэсидьиэнэ Владимир Путин сыллата ыытыллар пресс-кэмпириэнсийэтигэр эттэ.
«Уопсайынан киһи аймах сайдан иһэр. Оҕолор даҕаны төрөппүттэринээҕэр өйдөрө-санаалара киэҥ уонна ордук буолар. Ол биллэр суол, информация мунньуллан, дьоҥҥо тиэрдиллэр ньымалара тупсан иһэрэ көстөр. Мантан сылтаан, киһи айар дьоҕура сайдан иһэр. Кини түргэнник сүүрэр эбэтэр ыстаҥалыыр эрэ буолбатах, түргэнник, интэриэһинэйдик уонна дьоҕурдаахтык толкуйдуур», — диэтэ дойдубут Бэрэсидьиэнэ Владимир Путин.
Бэрэсидьиэн билигин үөрэх, ордук кыра саастарынан бөлөхтөргө, оонньууга олоҕуран бэриллэрин бэлиэтээтэ. «Ол иһин биһиги, дойду үрдүнэн үрдүк кыамталаах интэриниэти киллэрэргэ дьулуһабыт. Итиэннэ биһиэхэ бу үлэҕэ туһааннаах былааннар бааллар, харчыны көрөбүт. Билигин оскуолаларга бу үлэни хайыы-үйэ бүтэриэхтээхпит. Тыа сиригэр интэриниэти киллэрэргэ 24 млрд солк. тыырдыбыт», — диэн быһаарда.
Арассыыйа Бэрэсидьиэнэ Владимир Путин Уһук Илин эрэгийиэҥҥэ эдэр ыаллары дьиэлииргэ элбэх өйөбүл баарын бэлиэтээтэ: 2 %-наах чэпчэтиилээх, 3 %-наах тыа хаһаайыстыбатын, элбэх оҕолоох ыалга 6 %-наах ипэтиэкэлэр. Бэрэсидьиэн төһө да дьиэ сыаната үрдээбитин иһин, ипэтиэкэ ставката намтаан, дойду үрдүнэн 2021 сылга 90 мөл. кв. м олорор дьиэ үлэҕэ киллэриллибитин эттэ.
«Тупсуу баар, олорор дьиэлэрин усулуобуйаларын тупсарбыт ыаллар ахсааннара элбээн иһэр, чааһынай дьиэ туттааһына эмиэ киирсэр», — диэн Владимир Путин тоһоҕолоон бэлиэтээтэ.
«Уһук Илин эрэгийиэн бэйэтигэр ураты болҕомтону эрэйэр, бу комплекснай үлэ. Дьон көспөтүн гына, эрэгийиэҥҥэ олох таһымын үрдэтиэххэ наада. Онуоха туох нааданый? Онуоха экэниэмикэни сайыннарыахха, үрдүк технологиялаах, интэриэһинэй уонна хамнастаах үлэ миэстэлэрин оҥоруохха наада. Социальнай көмөнү умнуо суохтаахпыт», — диэн дойду Бэрэсидьиэнэ санаатын эттэ.
Онон биһиги таптыыр Сахабыт сирэ өссө да сайдарыгар, киһини тардар, умсугутар сир буоларыгар эрэллээхпит.