Арассыыйа уонна Украина сыһыаннаһыыларыгар биир дойдулаахтарбыт санааларын этэллэр, биир санаанан салайтаран түмсүөҕүҥ дииллэр.
Айхал Габышев, Саха сиринээҕи аҕалар лиигэлэрэ уопсастыбаннай тэрилтэтин бэрэссэдээтэлэ:
— РФ Бэрэсидьиэнэ Владимир Путин инникини өтө көрөн, ырааҕы ыйдаҥардан Донецкай уонна Луганскай Норуодунай өрөспүүбүлүкэлэр суверенитеттарын, тутулуга суох буолууларын уонна Украина сиригэр-уотугар анал байыаннай эпэрээссийэни ыытарын туһунан ылыммытын бары өттүнэн сөптөөх, мындыр быһаарыныы диэн сыаналыыбыт.
Биһиги кимтэн да, туохтан да куттаммаппыт. Биһиги курдук күүстээх, кыахтаах улуу судаарыстыбаны, модун Арассыыйаны тохтотор кыахтаах күүстэр суох этилэр, билигин даҕаны суохтар. Ол курдук ийэ сирбит бары өттүнэн кыахтаах уонна күүстээх. Дойдубут салалтата Украина сэбилэниилээх күүстэрэ күөттээбит атааннаһыыларын эйэлээхтик быһаарыахха диэн эппитэ өр буолла да, Украина төттөрү төрүөх бырабыыталыстыбата биир куомуннаахтарын кытта ити туруорсууну ылымматаҕа уонна онно сөптөөх харда эппиэти биэрбэтэҕэ.
Биһиги аҕа баһылыкпыт Владимир Путин сэриини саҕалаабата, кини эйэ иhин туруулаһарын бары өйдүөх тустаахпыт.
Биһиги норуоппут үйэлэр тухары аҕа дьиэ кэргэҥҥэ ураты улахан суолталааҕын өйдүүр. Хас биирдии аҕа дьиэ кэргэнин кэскилин туһугар, айылҕатын быһыытынан быһаарыныыны ылынар ураты аналлаах. Олох көрдөрөрүнэн аҕатын убаастаабат, өрө туппат ыал син биир кэхтэр. Ону өйдөөн туран, биһиги дойдубут инникитин түстүүр, солонор кэмигэр, бука бары аҕа баһылыкпыт Владимир Путин тула хайаан да түмсүөхпүтүн наада. Владимир Владимирович дойдутун уонна норуотун туһугар итинник быһаарыныыны ылынна диэн өйдүөх уонна ылыныах тустаахпыт.
Ил Дархаммыт Айсен Николаев улахан кыһалҕаҕа түбэспит дьоҥҥо көмөлөһөргө бэлэммитин туһунан бастакынан эппитин бары өйүүрбүтүн биллэрэбит. Бары биир санаанан салайтаран, көмөлөһүөххэйиҥ диэн ыҥырабын! Дойдубут чиэһин көмүскүү сылдьар хас биирдии саллаакка махталбытын биллэрэн туран, айылҕаттан кинилэри араҥаччылыырыгар көрдөһөбүн!
Оттон санкциялары этэр буоллахха, биһиги туохтан да куттаныа суохтаахпыт, санкциялартан сылтаан төттөрүтүн биһиги экэниэмикэбит өссө күүһүрүө, сайдыа.
Саха сиринээҕи Уопсастыбаннай палаата Луганскайтан уонна Донбасстан кэлбит дьоҥҥо көмөлөһөр сыалтан, туһаныллар малы-салы хомуйан саҕалаата. Амарах санаалаах ытык-мааны дьоммут көмөҕө кыттыһыахтара диэн эрэнэбит. Анал пууҥҥа таҥас-сап, оонньуурдары, дьиэҕэ-уокка туһаныллар малы-салы, тус гигиенаҕа туһаныллар сириэстибэлэри, кырачааннарга аналлаах буорту буолбат аhы аҕалыаххытын сөп.
Көмө пуунун аадырыһа:
Дьокуускай куорат, Орджоникидзе уулусса 10-с дьиэтэ, иккис этээс, аактабай саала.
Александр ТАРАСОВ.