Айдарыылаах оҕолору көрдүүр, өйүүр эрэгийиэннээҕи киин бастакы эспэдииссийэтэ түмүктэннэ
Бу күннэргэ СӨ Наукаларын Аччыгый академиятын баазатыгар үлэлиир, Саха сирин айдарыылаах оҕолорун көрдүүр эрэгийиэннээҕи киин бастакы үөрэтэр эспэдииссийэтэ түмүктэннэ. Педагогтар, экспиэртэр уонна преподавателлэр десаннара Уус Алдан, Чурапчы, Мэҥэ Хаҥалас улуустарыгар үлэлээтэ.
Эспэдииссийэни эрэгийиэннээҕи киин бииргэ үлэлэһэр тэрилтэлэрин – В.А. Босиков аатынан Муусука үрдүкү оскуолатын, Аксения уонна Наталья Посельскаялар ааттарынан Дьокуускайдааҕы балет оскуолатын-кэллиэһин итиэннэ Спортивнай эрэсиэрбэҕэ бэлэмниир өрөспүүбүлүкэтээҕи киини кытта кыттыһан СӨ Аччыгый академията тэрийдэ.
Улуустар тэрээһин саҥа көрүҥүн интэриэһиргээбиттэрин биллэрдилэр. Уопсайа, 1300 үөрэнээччини уонна педагогу хабан үлэлээтилэр. Кинилэргэ анаан лиэксийэлэри, сэминээрдэри, маастар-кылаастары, “төгүрүк остуоллары” ыыттылар. Ону тэҥэ, оҕолор бырайыактыыр уонна чинчийэр үлэ дьарыктарыгар, буулдьанан ытыы көмпүүтэргэ тренажеругар холонон көрдүлэр, о.д.а. тэрээһиннэргэ кытыннылар. Эспиэрдэр оҕо дьоҕурун, сатабылын (фунциональнай турук) чинчийэр кэлимсэ тэрээһиннэри тэрийдилэр.
“СӨ айдарыылаах оҕолору булан сайыннарар эрэгийиэннээҕи киин сүрүн соруктарыттан биирдэстэринэн, хас биирдии оҕо кыаҕын арыйар үөрэҕи уонна оҕо тус сайдыытын өйөөһүн буолар. Биһиги үөрэнээччилэр дьоҕурдарын уонна интэриэстэрин булан, салгыы сайдан барар суолларын ыйан-кэрдэн биэриэхтээхпит. Бу эспэдииссийэ түмүгүнэн, СӨ Наукаларын Аччыгый академиятыгар математикаҕа бырайыактыыр симиэнэҕэ ыҥырыылары уонна эрэгийиэннээҕи киин бииргэ үлэлэһэр үөрэх кыһаларыгар киирэллэригэр мэктиэ суруктары бэлэмниэхпит”, — диэн Спортивнай эрэсиэрбэҕэ бэлэмниир өрөспүүбүлүкэтээҕи киин дириэктэрин солбуйааччы, үөрэх эспэдииссийэтин салайааччыта Аграфена Колесова кэпсиир.
Бэлиэтээн эттэххэ, СӨ айдарыылаах оҕолору көрдүүр, өйүүр эрэгийиэннээҕи киин үлэтэ, СӨ Үүнэр көлүөнэтин пуондата “2021-2023 сылларга инники кэскилбит туһугар” бырайыагын иитинэн барар.
СӨ Үүнэр көлүөнэтин пуондатын пресс-сулууспата.