“Офсет” рекламнай-издательскай киин «Дьон-сэргэ биһирэбилэ” диэн литературнай күрэһи тэрийэр.
edersaas.ru
Күрэсхэ ханнык баҕарар айар түмсүү, тэриллии (официальнай регистрацията да суох буоллун) аатыттан иккилии кыттааччы бэйэтин айымньыларын дьүүллүүр сүбэ сыанабылыгар ыытан кыттар кыахтаах. Түмсүү чилиэннэрэ бэйэлэрин истэриттэн ким бастыҥ айымньылардааҕын, өрөспүүбүлүкэ таһымыгар ыытыллар күрэсхэ кыттар чиэскэ тиксэрин сүбэлэһэн, мунньахтаан эбэтэр куоластаан талаллар, быһаараллар.
Ол курдук, үлэлэри 2020 с. кулун тутар 5 күнүгэр диэри күрэс электроннай почтатыгар маннык аадырыска ыытаргытын күүтэллэр: ofset.pisateli@mail.ru
Усулуобуйа быһыытынан, түмсүү аатыттан кыттааччы литература хайа баҕарар жанрыгар (поэзия, проза, дыраама, оҕо литературата, аҕыйах ахсааннаах төрүт омуктар тылларынан) талбыт тиэмэтигэр суруллубут бэйэтин айымньыларгытын – 3-5 хоһоону, прозанан суруллубут 1 айымньыны (кэпсээни, сэһэни, арамааны, дырааманы, остуоруйаны уо.д.а.) ыйыллыбыт болдьох кэмҥэ диэри ыытара ирдэниллэр.
Үлэлэри идэтийбит суруйааччылартан турар дьүүллүүр сүбэ сыаналыаҕа.
«Дьон-сэргэ биһирэбилэ» литературнай күрэс түмүгэ 2020 сыл кулун тутар 14 күнүгэр Дьокуускай куоракка “Тээйэ” банкеттыыр саалатыгар күнүс 14 ч. үөрүүлээх быһыыга-майгыга биллэриллиэ уонна онно кыайыылаахтарга бириис туттарыллыа.
Үс бастакы миэстэни ылбыт кыайыылаахтар хас биирдиилэрин айымньыларын “Офсет” хампаанньа бэйэтин типографиятыгар үс кинигэ гынан бэчээттээн таһаарыа. Ону сэргэ, күрэсхэ киирбит бары түмсүүлэртэн үлэлэри түмэн, “Офсет” хампаанньа альманах-сурунаала күн сирин көрүө.
Билсэр төлөпүөннэргит: 8(411)236-92-91 эбэтэр 8(924)-767- 88-47
Тэрийэр бөлөх.
Надежда ЕГОРОВА бэлэмнээтэ.