Үһүс сылын ыытыллар, үтүө үгэскэ кубулуйбут “Айар ыллык-2017” литературнай куонкуруска үлэлэри тутуу саҕаланна.
Куонкуруһу СӨ Култуураҕа уонна духуобунай сайдыыга министиэристибэтэ, Саха сирин суруйааччыларын ассоциацията, СӨ сибээскэ уонна информационнай технологияларга министиэристибэтэ, Н.Е.Мординов-Амма Аччыгыйа аатынан «Кэскил» оҕо бэчээтин кыһата, „Чуораанчык“ уонна „Колокольчик+“ уус-уран оҕо сурунааллара тэрийэн ыыталлар.
“Айар ыллык-2018” саха литературатын төрүттээччи А.Е. Кулаковскай -Өксөкүлээх Өлөксөй төрөөбүтэ 140, сахалартан маҥнайгы учуонай-лингвист, сырдатааччы С.А. Новгородов 125, “Сахалыы сурук-бичик” саха маҥнайгы букубаара төрүттэммитэ 100, саха народнай поэта С.П. Данилов 100, биллиилээх бэйиэт, публицист С.С. Васильев-Борогонскай 110, прозаик, драматург В.А. Протодьяконов-Кулантай 105 сылларыгар ананар. Быйылгы сүрүн уратытынан, кыттааччы 18-тан үөһэ саастаах буолара ирдэнэр.
Оҕоҕо төрөөбүт тылга тапталы иҥэрэр, кини истэр, саҥарар, өйдүүр дьоҕурун сайыннарарга сөптөөх айымньылар айыллан тахсыыларын, айар, суруйар талааннаах дьону көҕүлүүр, өйүүр, оҕо литературатыгар суруйар саҥа ааттары булар сыаллаах-соруктаах ыытыллар.
Куонкурус усулуобуйатын быһыытынан, уус-уран айымньы литература икки жанрыгар ыытыллар: 1. Кэпсээн. 2. Остуоруйа.
Айымньы сахалыы уонна нууччалыы тылынан суруллуон сөп.
Бастыҥ айымньылар оҕо сурунаалларыгар бэчээттэниэхтэрэ. Ону таһынан, ботуччу харчынан бириэмийэлэниэхтэрэ (сахалыытыгар туспа, нууччалыытыгар туспа).
I миэстэ: кэпсээҥҥэ – 30 000 солк., остуоруйаҕа – 20 000 солк.
II миэстэ: кэпсээҥҥэ – 20 000 солк., остуоруйаҕа – 10 000 солк.
III миэстэ: кэпсээҥҥэ – 10 000 солк., остуоруйаҕа – 5 000 солк.
Сүрүн ирдэбиллэр:
— Куонкуруска кыттыы усунуоһа — 500 солкуобай, киирбит харчы тулаайах оҕолорго аһымал акция быһыытынан „Чуораанчык» уонна «Колокольчик+» сурунааллары сурутууга туһуланар.
- Хас биирдии айымньы оҕо өйдүүр дьоҕурун сайыннарар, тылын-өһүн байытар, кини интэриэһин тардар дириҥ, дьикти ис хоһоонноох буолуохтаах.
- Айымньы ис хоһоонунан оҕоҕо чугас, дьонугар-сэргэтигэр, тулалыыр эйгэтигэр, сиэргэ-туомҥа, төрөөбүт сиригэр-уотугар истиҥ тапталы иҥэрэр, төрөөбүт түөлбэтин, улууһун, дойдутун историятын арыйар, билиһиннэрэр, күннээҕи олоххо уйугас, кыахтаах, толкуйдаах буолар хаачыстыбалары иҥэрэр сылаас тыыннаах буолуохтаах.
- Ааптар айымньыны оҕо толкуйдуур ыырын кэҥэтэр, ырытар дьоҕурун эбии эрчийэр гына иитэр-үөрэтэр эйгэ бары ньыматын туттан, бэйэтин кыаҕынан сирдэтиэхтээх.
- Оҕо билиигэ-көрүүгэ кэрэхсэбилин уһугуннарар күүстээх, итиэннэ онно дьулуһары күөртүүр сатабыллаах уран тиэмэлээх буолуохтаах.
- Айымньы кинигэҕэ киирбэтэх, бэчээттэммэтэх буолуохтаах.
- Айымньы көмпүүтэргэ Times Sakha, Times New Roman 14-тээх шрибинэн, икки арда 1,5 см тэйитэн бэчээттэммит буолуохтаах уонна А4 кээмэйдээх кумааҕыга үстүү эксэмпилээргэ принтеринэн таһаарыллар. Айымньы электроннай көрүҥэ дьүүллүүр сүбэҕэ эмиэ туттарыллар.
- Суруллубут айымньы анныгар ааптар хос аата (псевдонима), эбэтэр араспаанньата уонна айымньытын толору аата суруллар.
- Куонкуруска киирбит үлэтин кытта туһааннаах докумуоннары кытта анал кэмбиэргэ угуллар. Дьиҥнээх аата-суола ыйыллар, олорор аадырыһын, төлөпүөнүн нүөмэрин толору ыйар, пааспарын дааннайдарын кытта ИНН уонна СНИЛС куопуйаларын угар уонна куонкурус хамыыһыйатыгар туттарар.
Дьэ, онон, сэргээбит буоллаххына, кытаат, кыттарга тиэтэй! Оҕо литературатын сайдыытыгар бэйэҥ кылааккын киллэр!
Куонкуруска кыттар айымньылары 2017 сыл ахсынньы 10 күнүгэр диэри маннык аадырыска күүтэбит: 677000 Дьокуускай к., Орджоникидзе уул. 31 №-рэ, „Чуораанчык“ уонна „Колокольчик+“ оҕо сурунаалларын эрэдээксийэтэ, 1 этээс, 126, 127 №-дээх кэбиниэттэр.
Билсэр нүөмэрдэргит: 34-29-82, 89142807263.
Ааптар куонкуруска киллэрбит айымньытын туһанарга толору быраап СӨ «Кэскил» оҕо бэчээтин кыһатын туһатыгар киирэр. Кыайыылаахтарын чиэстээһин, наҕараадалары туттарыы үөрүүлээх быһыыга-майгыга ыытыллыа.
Куонкурус туһунан сиһилии www.keskil14.ru сайтка киирэн билсиҥ.
Бэлэмнээтэ Ангелина Васильева.