Бүлүү улууһун култуураҕа салалтата Улуу тунах ыһыахтары көрсө, сахалыы таҥаһы-сабы тигиини сырдатан, норуот маастардарын айар быыстапкаларын тэрийэр.
Биир оннук тэрээһин бу күннэргэ буолла — Бүлүү куорат килбэйэр киинигэр Лөкөчөөн нэһилиэгин уран тарбахтаах иистэнньэҥэ Феодосия Григорьева айар үлэтин быыстапкатын туруорда. Манна сылдьыбыт дьон маастар оһуордаан-мандардаан тикпит сахалыы таҥастарын, сарыынан итиэннэ кылынан-сиэлинэн оҥоһуктарын бэркэ кэрэхсии, хайҕыы көрдүлэр.
— Эдэр эрдэхпиттэн иистэнэрбин, баайарбын сөбүлүүбүн, — диэн кэпсиир Феодосия Афанасьевна. — Бастаан көннөрү сабынан спицанан, күрүчүөгүнэн баайар этим, онтон биир маастар сылгы сиэлинэн уонна кылынан арааһы өрөн оҥорбутун туһунан биэриини тэлэбиисэринэн көрөн бараммын, олус сэҥээрбитим. Айылҕа бэйэтинэн уунан биэрбит бэртээхэй матырыйаала бу сылдьар эбит диэммин, кылга уонна сиэлгэ ылсыбытым. Баайар киһи хайдах сатыа суоҕай? Кылаабынайа, сабын, утахтарын эрэ сатаан оҥоруохха наада. Саамай үлэлээҕэ ити, ону сатаабыт киһи тугу баҕарар баайан таһаарар кыахтаах. Ити курдук, сиэлинэн уонна кылынан 2001 сылтан дьарыктаммытым. Массажертан саҕалаан, тапочкалары, сэлээппэлэри, араас сувенирдары, дэйбиирдэри, саламалары, харысхаллары оҥоробун. 2008 с. «Хотугу сулус» телерадиоакадемия куонкуруһугар кыттан лауреат буолбутум, «Лучший театр мод» номинацияҕа тиксибитим. 2007 сылтан оскуолаҕа куруһуок салайабын. Оҕолор син дөбөҥнүк ылыналлар, икки сыл дьарыктаммыттар бэйэлэрэ атыттары үөрэтиэхтэрин сөп буола үүнэллэр. Нэһилиэктэргэ ыҥырдахтарына, маастар-кылаас ыытабын.
Өр сыллаах айар үлэтин сыаналаан, олохтоох дьаһалта баһылыга Анна Доргонова маастар-педагогка нэһилиэк саамай үрдүкү наҕараадатын – “Лөкөчөөн нэһилиэгин Бочуоттаах олохтооҕо” буолбутун туоһулуур докумуону, оскуола дириэктэрэ Аида Леонтьева »Оскуола Бочуоттаах выпускнига» бэлиэни туттардылар. Айар быыстапкатынан итиитик-истиҥник эҕэрдэлээтилэр, үлэтигэр өссө үрдүк ситиһиилэри, чэгиэн доруобуйаны баҕардылар.
Раиса Сибирякова, «Саха сирэ» хаһыат, edersaas.ru