Бүгүн «Айар» кинигэ кыһатын эрэдээктэрэ, Евдокия Семеновна Иринцеева-Огдо үбүлүөйдээх күнэ!
Евдокия Семеновна 1962 сыл кулун тутар 25 күнүгэр Кэбээйи улууһун Тыайа сэлиэнньэтигэр төрөөбүтэ. 1979 с. Кэбээйи орто оскуолатын, 1985 с. СГУ омук тылын факультетын, онтон филология факультетыгар суруналыыстыка салаатын бүтэрбитэ. “Кэскил”, “Юность Севера” оҕо хаһыаттарга кэрэспэдьиэнтэн саҕалаан сүрүн эрэдээктэргэ диэри үүммүтэ.
СӨ үөрэҕэриитин туйгуна (1997), СӨ бэчээтин туйгуна (2001), СӨ сурналыыстарын сойууһун “Көмүс бөрүө” Өрөспүүбүлүкэтээҕи бириэмийэтин (2003), суруналыыстыкаҕа СӨ Судаарстыбаннай бириэмийэтин лауреата (2010), “Идэлээх холбоһук иннигэр өҥөтүн иһин” РФ Суруналыыстарын сойууһун бочуоттаах бэлиэтин хаһаайына (2019).
“Открытая Евразия-2016” Мария Шевель аатынан аан дойдутааҕы литературнай күрэс лауреата, кини аата Оҕо литературатыгар норуоттар икки ардыларынааҕы Сэбиэт Бочуотун испииһэгэр киирбитэ (Швецария, 2018). “Мэник сэлиичээн” остуоруйата аангылыйалыы, “Санатыма ду ааспыты” сэһэнэ бүрээттии тылбаастаммыттара.
Олох араас моһоллоруттан чаҕыйбат күүстээх санаалаах, өрүү тулатын сэргэхситэр тэбэнэттээх, оҕо курдук үөрүнньэҥ майгылаах, ис дьиҥэ олус мындыр, муударай, күндү таас эгэлгэ өҥүнэн күлүмнүү оонньуурун тэҥэ барҕа талааннаах, эдьиий курдук астык, айылҕаттан айдарыылаах дьүөгэлээх бииргэ үлэлиир ытыктыыр кэллиэгэбитин Евдокия Семеновнаны, Огдо суруйааччыбытын, олоҕуҥ бэлиэ түгэнинэн ис сүрэхтэн иһирэхтик эҕэрдэлээтэхпит буолуохтун!
Эркин курдук эрэллээх олоҕуҥ аргыһын Александр Сократович, күн күбэй ийэлэрин ытыстарыгар илдьэ сылдьар уолаттарыҥ, таптыыр-харыстыыр дьиэ кэргэниҥ, кэлэктиибиҥ өйөбүлүнэн айар, эрэдээктэр быһыытынан үлэҥ мэлдьи өрө дэбилийэ турдун, чиргэл доруобуйалан, куруутун үөрэ-көтө сырыт!
«Айар» кинигэ кыһатын кэлэктиибэ.