Бүгүн, олунньу 18 күнүгэр, «Айарбук» диэн ааҕыыга аналлаах саҥа мобильнай сыһыарыы сүрэхтэниитэ буолла. Бу сыһыарыыны «Айар» национальнай кинигэ кыһатын генеральнай дириэктэрин Август Васильевич Егоров көҕүлээһининэн, Алексей Баишев салайааччылаах «Квантум» ай-ти хампаанньа көмөтүнэн оҥоһулунна.
2010 сылтан «Айар» электроннай учебниктары оҥорор уопуттаах буолан, бу электроннай уонна аудиокинигэлэр киирбит сыһыарыылара күүтүллүбүт бородуукта буолар. 2020 сылтан үлэтэ саҕаланан, быйыл Ийэ тыл күнүн көрсө «Айарбук» сыһыарыы күн сирин көрдө.
Бу сыһыарыыга уопсайа 500-тэн тахса: 470 электроннай уонна 70-ча аудио-форматтаах саха, нуучча, хотугу норуоттар тылларынан кинигэлэр киирдилэр. Жанрдарынан: оҕоҕо, төрөппүккэ анаммыт литература, прикладной кинигэлэр, уус-уран айымньылар, сынньалаҥҥа, аска-үөлгэ анаммыт кинигэлэр киирдилэр. Манна сүүстэн тахса аудио уонна электроннай кинигэлэр босхо бааллар.
Сыһыарыыга суруттарарга тус бэйэҕитигэр табыгастаах тарыыбы талыахха сөп. Сурутуу диэн туох да хааччаҕа суох сыһыарыынан туһаныы буолар. Ол эбэтэр, биир-икки кинигэни эрэ буолбакка, бибилэтиэкэни барытын ылан ааҕыаххытын сөп.
Ол курдук, «Премиум» тарыыбынан бибилэтиэкэ бары кинигэтинэн туһаныаххытын сөп. Оттон «Стандарт» тарыыбынан оҕолорго аналлаах уонна уус-уран литература айымньыларыгар киирэҕит.
Төһө баҕарар кинигэни эрдэттэн интэриниэттээх сиртэн хачайдаан ылыҥ, оччоҕо сибээһэ да суох сиргэ сырыттаххытына ааҕар кыахтанаҕыт. Сыһыарыыга бастаан киирдэххэ 14 күн босхо туһанаргытыгар ананар.
«Айар» кыһа биир сүдү айымньыта – аныгы олоххо тустаах, туһалаах таһаарыыта киэҥ эйгэҕэ тарҕанан, биллэн-көстөн, туһалаан иһиэ диэн бигэ эрэллээхпит. Кинигэни ааҕыҥ, истиҥ, өрүү илдьэ сылдьыҥ, Сахабыт сирин литературата, тыллара сайда турдуннар уонна хас биирдии ааҕааччыга тиийдиннэр.
Сыһыарыыны бу сыылкаларынан хачайдааҥ:
iOS — https://apps.apple.com/us/app/ayarbook/id1579289301
Android — https://play.google.com/store/apps/details?id=com.ayarbook