Култуура Маны аах

«Айар» кинигэ кыһата non/fictio№23 дьаарбаҥкаҕа кыттыаҕа

Ахсынньы 2-6 күннэригэр Москваҕа non/fiction №23 диэн интеллектуальнай литература норуоттар икки ардыларынааҕы дьаарбаҥкалара ыытыллар. Бу кинигэ бэчээтин эйгэтигэр биир саамай киэҥ бырагыраамалаах тэрээһин буолар. Манна араас биллэр суруйааччылар кыттыылаах сэминээрдэр, «төгүрүк остуоллар» тэриллиэхтэрэ. 

Ол курдук, Австрия, Беларусь, Болгария, Великобритания, Венгрия, Германия, Греция, Дания, Израиль, Иран, Испания, Италия, Казахстан, Китай, Мексика, Нидерланды, Норвегия, Польша, Арассыыйа, АХШ, Тайвань, Украина, Финляндия, Франция, Хорватия, Чехия, Швеция, Эстония уонна Япония курдук дойдулартан барыта 300-тэн тахса кинигэ бэчээттиир кыһа, кинигэ атыылыыр хампаанньалар кытталлара күүтүллэр. Дьаарбаҥкаҕа 40 000 киһи сылдьыаҕа, олор истэригэр кинигэ бэчээтигэр сыһыаннаах идэтийбит публика, литературнай кириитиктэр, ааҕааччылар.

«Айар» кинигэ кыһата бу тэрээһиҥҥэ ааптардары, таһаарааччылары, кинигэ атыылааччылары, литературнай кириитиктэри, агеннары, тылбаасчыттары кытта быһа хантаак олохтоору уонна, биллэн турар, бэйэ оҥорон таһаарыытын билиһиннэрэр сыаллаах кыттар.

Итиэннэ кыһа «Сыл кинигэтэ-2021» куонкуруска лауреат уонна  «Ревизор-2021» куонкурус бастыҥ инновационнай бырайыагын ааттарын ылбыт астрофизиктар Иван Панченко, Елена Киричек ааптардардаах  «Неизвестное Солнце. Расследование. Чудеса. Факты. Загадки» кинигэни дьаарбаҥка кыттыылаахтарыгар билиһиннэриэҕэ.

Презентация сарсын, ахсынньы 2 күнүгэр, сэминээрдиир зонаҕа 13:00-13:45 чааска ыытыллыаҕа: https://youtu.be/_jX2ScDTDow

Интэриэһиргээччилри уонна биир дойдулаахтарын «Айар» кинигэ кыһата ахсынньы 2-6 күннэригэр Москваҕа Гостинай дворга оҕо литературатын салаатыгар (стенд № L-18) ыҥырар.

Дьаарбаҥка күннэригэр «ММС» курьерскай сулууспа үлэлиэҕэ. Атыыласпыт кинигэлэргитин Москваҕа уонна Московскай уобаласка аадырыска диэри тиэрдэн биэриэхтэрэ.

0
0
Telegram @edersaas20