«Айар» кинигэ кыһата Надежда Егорова-Намылыны кытары көрсүһүүнү тэрийдэ

Дьону-сэргэни кытта үлэлииргэ, алтыһарга кэлиҥҥи сылларга баар балаһыанньа кэккэ ыарахаттары, моһоллору-мэһэйдэри үөскэттэ.

Инньэ гынан ким хайдах табылларынан дьаһанан, тэринэн үлэ-хамнас тэтимин сүтэрбэккэ барарын ситиһэр. Бүгүн биир оннук тэрээһиҥҥэ — «Айар»  кинигэ кыһата ыыппыт «Айардыын сарсыардааҥҥы аһылык» диэн инстаграмм былаһааккатыгар быһа эпииргэ кытынным. Сүрдээх сэргэх, киһи болҕомтотун тутар, санааны эбэр, эйгэни кэҥэтэр, соһуччу үөрүүлээх көрсүһүүлэрдээх буолан биэрдэ. Дьиҥ туһуламмыт сыала Н.П.Егорова – Намылы Иннокентий Поповтуун кыттыгас айымньыларын «Тайҕа таайыллыбатах таптала» диэн сэһэн тула кэпсэтии-сэһэргэһии, ырытыы, санааны атастаһыы буолла. Көрөрбүт курдук айымньы хара суруллуоҕуттан – икки ааптардааҕынан даҕаны интэриэһи үөскэтэр. Аны суруллубут тыла-өһө киһиэхэ тиийимтиэ, таарыллыбыт тиэмэтэ, эйгэтэ  — киһи орто дойдуга олорор олоҕун тухары истиҥи, сылааһы, дууһаны долгутары биэрэр иэйиини – тапталы хоһуйуу, киһи киһиэхэ сыһыанын кэпсээһин буоларын быһыытынан хайа баҕарар киһиэхэ чугас. Көрсүһүүгэ кэлбит хас биирдии киһи хаһан эрэ, ханна эрэ Надежданы кытта алтыспыт, кини айымньылаах үлэтин, кини ис иһиттэн сэмэй майгытын дьиҥ чахчы билэр буоланнар, төһө да бэйэ бэйэлэрин билсибэтэллэр биир ыал оҕотун курдук иллээхтик, ураты сылаастык көрүстүлэр. Этэргэ дылы Намылы бэйэтин курдук хайдах эрэ сып сырдык сыдьаай, ип ичигэс салгын кэлэргэ дылы гынна.
Мин биири бэлиэтээн этиэхпин баҕардым. Манна кэлбит дьон бары араас эйгэҕэ үлэлиир, ким түргэн, ким оргууй наллаан, ким утаппыттыы суруйа-бичийэ, ким суруйбуту хомуйан кинигэ таһаара, ким бэйэтэ айа-тута сылдьабыт, ол эрээри барыбытын холбообут, биллибэтинэн, сыыйа бэйэтин эйгэтигэр киллэрбит Надежда Егороваттан-Намылыттан тулуурдаах, дьулуурдаах, дьоҥҥо үтүөнү-кэрэни хайаан да булан көрөр буоларга үөрэнэбит эбит дии санаатым. Көр, оннооҕор уопсастыбаннай тырааныспарга айанын бириэмэтин мээнэҕэ ыыппат, суруналыыс хараҕынан таба көрөн бэйэтин курдук нарын намчы, сырдык дьону булан ылыы киһи аайы бэриллибэтэх талаан буоллаҕа.
Барыгытыгар сэргэх сэһэҥҥит, кэрэхсэбиллээх кэпсээҥҥит, Евдокия дьырылатар-дьиэрэһитэр тойугуҥ иһин махтал.

«Айар» кинигэ кыһата  бэртээхэй бырайыаккыт иһин улахан махтал.
Чахчыта таайтарыылаах, таайбараҥнаах таҥха ыйын кэрэ бэлэҕин курдук ылынным бүгүҥҥү күнү.

Руфова Наталья-Балааҕыйа баайа Барахсаана.