Муус устар 20-24 күннэригэр Нур-Султан куоракка Евразия норуоттарын икки ардыларынааҕы Eurasian Book Fair-2022 диэн кинигэ быыстапка-дьаарбаҥката бэһис төгүлүн буолан ааста. Быыстапка сыалынан ааҕыыны көҕүлээһин, өйөөһүн, литературнай баайы сайыннарыы буолла. Тэрээһини Казахстан өрөспүүбүлүкэтин «Фолиант» диэн кыһата тэрийдэ.
Eurasian Book Fair-2022 — бу киэҥ далааһыннаах биэс күннээх култуурунай-дьыалабыай тэрээһин. Быыстапка чэрчитинэн уус-уран, үөрэх, научнай, оҕо кинигэлэрин киэҥ эйгэҕэ билиһиннэрдилэр, кинигэ оҥоруутун туһунан кэпсээтилэр, сайыннарар-айар кииннэртэн оҕолорго аналлаах маастар-кылаастары, поэзия киэһэлэрин, суруйааччылар автограф-сессияларын уонна «төгүрүк» остуоллары ыыттылар.
Бэйэлэрин көрдөрө уонна билиһиннэрэ диэн 80-тан тахса бэчээттиир, кинигэ атыылыыр, полиграфическай, үөрэх, билим тэрилтэлэрэ, холобура, «Мектеп», «Атамура», «Лантар», «МИФ, «Белый город», «Машины творения» «Просвящение», «Самокат», Mega Basym, China Renmin University Press полиграфиялара, Иран, Испания Посольстволара, Казахстантан үрдүк үөрэх кыһалара, олор истэригэр «Айар» кинигэ кыһата ыалдьыттаатылар.
«Айар» кыһа маҥнайгытын Евразияҕа бэйэтин кинигэлэрин көрдөрдө. Казаахтар бырааттыы түүр тыллаах омук буолан, саха кинигэлэрин олус интэриэһиргээтилэр. «Саха поэзиятын антологията», Николай Лугинов «Чыҥыс Хаан ыйааҕынан» арамаана казаахтыы тылбаастаммыттарын көрөн үөрүүбүт, киэн туттуубут үксээтэ. Быыстапка кэмигэр оскуола оҕолорун оптуобуһунан быыстала суох таһан көрдөрөллөр, иһитиннэрэллэр эбит.
Куруук буоларын курдук, бу быыстапкаҕа «Айар» кыһа кинигэлэрэ үрдүк сыанабылы ыллылар. Ол курдук, «Лучшая учебная книга » номинацияҕа 1-с истиэпэннээх диплому «Одун Букварь», «Наука и инновации» диэн номинацияҕа 1-кы истиэпэннээх диплому «Неизвестное солнце. Чудеса. Факты. Загадки. Расследования», «Культура и искусство» диэн номинацияҕа 2-с истиэпэннээх диплому Мандар Уус «Узоры и орнаменты саха», «Лучшее краеведческое издание» диэн номинацияҕа 3-с истиэпэннээх дипломунан «Иллюстрированная энциклопедия Республика Саха (Якутия)» кинигэлэр наҕараадаланнылар.