Москва куоракка онус төгүлүн “Ревизор” профессиональнай сатабыл далааһыннаах күрэһэ ыытылынна.
Бу улахан күрэс түһүлгэтигэр “Айар” национальнай кинигэ кыһата “Инновационный книжный проект” анал аакка “Неизвестное Солнце. Чудеса. Факты. Загадки. Расследование” кинигэнэн кыайыылааҕынан тахсыбыт, Ревизор анал статуэткатын туппут. Маны сэргэ, «Сыл издательствотыгар» “Арассыыйаҕа кинигэ дьыалатын сайыннарыыга кылаатын иһин” үбүлүөйдээх дипломунан наҕараадаламмыт.
Бэлиэтэнэринэн, 14 номинацияҕа Арассыыйа 30 эрэгийиэниттэн 200-тэн тахса сайаапка киирбит. “Ревизор” профессиональнай сатабыл куонкуруһа 2012 сылтан ыытыллар. Тэрийээччилэринэн “Книжная индустрия” сурунаал, Арассыыйатааҕы кинигэ холбоһуга, норуоттар икки ардыларынааҕы кинигэ быыстапкатын уонна дьаарбаҥкатын генеральнай дириэксийэтэ, РФ цифровой сайдыыга, сибээскэ уонна маассабай коммуникацияларга министиэристибэтэ буолаллар.
Маны таһынан, “Сыл кинигэтэ” национальнай куонкуруска Non-fiction номинацияҕа “Неизвестное Солнце. Чудеса. Факты. Загадки. Расследование” кинигэ сүрүн бирииһинэн наҕараадаламмыт. Быйыл бу күрэскэ Арассыыйа 30 куоратыттан 110 издательство кыттыбыт, 700-тэн тахса кинигэ дьүүллүүр сүбэ көрүүтүгэр киллэриллибит.
Өрөспүүбүлүкэ 100 сылын көрсө улахан ситиһии, бэртээхэй бэлэх!