Айар балаҕан тутуллар (ВИДЕО)

Ааптар: 
Бөлөххө киир:

Таатта улууһун Дьохсоҕон нэһилиэгэр биир үөрүүлээх бэлиэ күн тосхойдо.

РСФСР  үтүөлээх механизатора М.Н.Тихонов аатынан сынньалаҥ пааркатыгар Улуу убайдарбыт А.Е.Кулаковскай-Өксөкүлээх Өлөксөйгө, А.И.Софронов-Алампаҕа аналлаах бүччүм литературнай түһүлгэлэҕэ балаҕан акылаата түстэ.

Бу олохтоох бибилэтиэкэр Галина Другина  салайааччылаах «Куорсун» айар түмсүү дьоно өтөрдөөҕүттэн ыраламмыт санаабыт. Онтубут олоххо киирэн эрэриттэн үөрүүбүт үрдээтэ. Манна түмсүүбүт биир көхтөөх кыттааччыта, олоҥхону суруйар Акулина Егасова—Дьохсоҕон кыыһа ыытыллар үлэҕэ сүбэһит быһыытынан сылдьар.  Олохтоох маастар Яков Бочонин нэһилиэк ытык дьонун-сэргэтин санаатын истэн, ырытан, толкуйдаан, уонна РФ култууратын үтүөлээх үлэһитэ, РФ уонна СӨ архитектордарын сойууһун чилиэнэ Эрнест Алексеев кинигэтинэн сирдэтэн, балаҕан тутуутун саҕалаата.  Киниэхэ күтүөтэ Николай Владимиров көмөлөһөн үөрүүбүтүн өссө үксэттэ. Тыыл бэтэрээнэ, хоһоонньут, кэпсээнньит Иван Бочонин аал уоту арыылаах алаадьынан, саламаатынан, сылгы сиэлинэн күндүлээтэ. Алгыһы нэһилиэк уопсастыбаннай олоҕун көхтөөх кыттааччыта Любовь Власова кучу чэйинэн ситэрэн-хоторон биэрдэ. Түгэнинэн туһанан, балаҕаммыт маһын тыаттан буор босхо таһан, пилорамаҕа  эрбэтэн биэрбит  биир дойдулаахпытыгар Гаврил Петровка итиэннэ балаҕаммыт тутулларыгар көх-нэм, өйөбүл буолбут дойдулаахтарбытыгар махталбытын тиэрдэбит. Үөрүүлээх бэлиэ түгэҥҥэ мустубут  дьон сүргэлэрэ көтөҕүлүннэ, санааларын үөрэ-көтө үллэһиннилэр.

Манна, ыалдьыттары үөрэ-көтө көрсөр түһүлгэбитигэр, балаҕаммытыгар сайынын ыччаттарбыт Улуу убайдарбытыгар сүгүрүйэн хоһоон ааҕан, ырыа ыллаан, олоҥхолоон, сэһэргэһэн, санаа үллэстэн ааһар бэртээхэй уонна туһалаах түһүлгэлэрэ буолуо диэн эрэнэбит.

Изабелла Жараева, Алампа аатынан норуот айымньытын дьиэтин дириэктэрэ,

«Куорсун» литературнай түмсүү чилиэнэ

+1
0
+1
0
+1
0
+1
0
+1
0
+1
0
+1
0