Бэйэни хааччахтааһын кэмигэр Ростуризм дойду иһигэр айаннааһыны өйүүр сыалтан анал бырагырааманы оҥорбута. Ол чэрчитинэн, айаҥҥа ороскуоккут сорох чааһын төннөрүөххүтүн сөп. РФ бырабыыталыстыбата бу сыалга 15 миллиард солкуобайы көрбүтэ, онон 3 мөлүйүөн киһи бу көмөнөн туһаныан сөп.
Атырдьах ыйын 21 күнүттэн 28 күнүгэр диэри чэпчэтиилээх турдары атыылаһыахха сөп. Маныаха хайаан да “Мир” каарталаах буолуохтааххын. privetmir.ru систиэмэҕэ киирэн, регистрацияланаҕыт. Ол кэнниттэн мирпутешествий.рф саайтка киирэн, ханна барыаххытын, ханнык гостиницаҕа олоруоххутун баҕараргытын талаҕыт. Тур сыанатын тута толору төлүүгүт.
Биэс күн иһинэн каартаҕытыгар кэшбек кэлэр (харчыгыт төннөр). 25-50 тыһыынча солкуобайдаах туртан – 5 тыһыынча солкуобай, 50-75 тыһыынча солкуобайдаах туртан – 10 тыһыынча солкуобай, 75 тыһыынча солкуобай үөһээ – 15 тыһыынча солкуобай төннөр.
Бырагыраамаҕа Арассыыйа эрэгийиэннэрэ бары кытталлар, арай, Крымҥа, Алтаайга, Калининградка, Краснодарга, Ставропольскай кыраайга алтынньы 1 күнүттэн саҕаланар турдарга атыылаһар көҥүллэнэр. Атыыласпыт күн сарсыҥҥытыттан да айаҥҥа турунуохха сөп, ол эрээри бырагыраама бу сыл бүтүөр эрэ диэри үлэлиир.
Бырагыраамаҕа 2 тыһыынча кэриҥэ туроператор, ону тэҥэ, гостиницалар, санаторийдар, турбазалар кытталлар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.