Айаан Прокопьев: «Бастакынан сүүрэн тиийбиппин өйдөөбөккө да хаалбытым»
Алтынньы 29 күнүгэр М. Алексеев аатынан өрөспүүбүлүкэтээҕи лиссиэй-интэринээт 8-с кылааһын үөрэнээччитэ Айаан Прокопьев ууга түспүт киһини быыһаата. Эдэр оҕо хорсун санаатын, эр киһилии дьоруойдуу быһыытын хайҕыахха эрэ сөп.
Айаан бэйэтэ олус симик, кыратыттан дуоспуруннаах, аһыныгас, кыаммакка-кырдьаҕаска өрүү көмөлөһөр бастыҥ хаачыстыбалааҕын туһунан ийэтэ Надежда киэн тутта кэпсиир. «Киһи алдьархайга түбэспитин көрөн, хайдахтаах да түгэҥҥэ, кыах баарынан, санаа күүһэ хоторунан ханнык баҕар киһи көмөлөһө сүүрүө этэ дии саныыбын… Оҕом уолуйан хаалбакка, киһини өлөр өлүүттэн быыһаабыта хайҕаллаах» – диир.
Айаан бэйэтэ этэринэн, кини туох да дьоруойдуу быһыыны оҥорботох, ханнык баҕарар киһи иэдээҥҥэ түбэспит киһини быыһыы сүүрүөҕэ диэн оҕолуу ыраас санаатын этэр:
– Ол күн мин доҕотторбун кытта түөрт буолан үүт собуотун диэкиттэн дьаарбайан испиппит. Арай көрдөхпүтүнэ, кыра көлүйэҕэ киһи баара көстөрө. Бастакынан сүүрэн тиийбиппин өйдөөбөккө да хаалбытым. Ыксаабакка, туох баар быраабыланы тутуһан туран, иннибинэн сыыллан тиийэн табаарыһым биэрбит маһын киһибэр ууммутум, маһы сатаан туппатаҕа, ол иһин кэннибинэн сыҕарыйан аны атахпын биэрбитим, тутуһа-тутуһа ыһыктан кэбиһэр этэ… Онтон илиибинэн илиитин харбаан соһон таһаарбытым. Бу барыта аҕыйах кэм иһигэр этэ да, киһи олоҕо миигиттэн тутулуктааҕын өйдөөн, уолуйбут санаабар өр «мучумааннаммыт» курдук этибит…
Айааны кытта кэпсэтиибит түмүгэр билбитим, ууга түспүт киһи – 19 саастаах инбэлиит эбит. Дьоруой уол кинини урут бу эргин дьаарбайа сылдьарын көрөр, дьиэтэ ханан баарын билэр эбит. Онон, табаарыстыылар киһини таһаараат, дьиэтигэр арыаллаан илдьибиттэр. «Тиэргэҥҥэ уол аҕата баанньык отто сылдьара. Биһиэхэ махтанан минньигэһинэн күндүлээбитэ, хос-хос махтаммыта, долгуйбут этэ» – диэн бүгүҥҥү күн дьоруойа кэпсиир.
Оннооҕор улахан киһи, уолуйан, куттанан алдьархайга түбэспит киһини быыһыы сүүрэригэр эрэнэр уустук үйэтэ тиийэн кэллэ. Баара-суоҕа 14 саастаах Айаан Прокопьев уонна кини доҕотторо хас биирдии киһиэхэ холобур буолар үтүө ыччаттар үүнэн эрэллэрин бу үтүө быһыыларынан көрдөрдүлэр.
Оттон улуустааҕы Үөрэх бырабылыанньатын начаалынньыга Спиридон Борбуев улуус салалтатын итиэннэ быыһыыр-көрдүүр сулууспатын аатыттан хорсун хоодуот уолу наҕараадалыыр туһунан эттэ.
Валентина ДОГОЮСОВА, Үөһээ Бүлүү
edersaas.ru сайтка анаан