Бэҕэһээ, атырдьах ыйын 26 күнүгэр, Париж куоракка түмүктэммит көҥүл тустууга аан дойду чөмпүйэнээтигэр саха бөҕөстөрө Арассыыйа хамаандатыттан кыттыбатахтара. Онон тустууну сэҥээрээччилэр болҕомтолоро бүүс бүтүннүү Кыргызстантан кыттар Айаал Лазаревка (125 кг) уонна Македония чиэһин көмүскүүр Владимир Егоровка (57 кг) туһаайыллыбыта.
Хомойуох иһин, Амма тустууга оскуолатын иитиллээччитэ Владимир Егоров бастакы көрсүһүүтүгэр хотторон, тута туораата.
Оттон Айаал Лазаревпыт аан дойду көбүөрүгэр бастакы хапсыһыытыгар Роберт Бараны (Польша) кытта күөн көрүстэ. Өйдүүргүт буолуо, былырыыҥҥы Рио-де-Жанейротааҕы Олимпийскай оонньууларга Айаал бу бөҕөскө хотторон турар. Бастакы түһүмэх 1:1 ахсаанынан поляк туһатыгар түмүктэннэ. Иккис түһүмэххэ Айаал кимиилээхтик тустан, ахсааны 8:6 оҥорон, тус бэйэтигэр дьоһун кыайыыны сурунна.
Салгыы Айаал Лазарев Япония эдэр бөҕөһө Таики Ямомотаны кытта туһунна. Ямомото уолаттарга (2014 с.) уонна улахан дьоҥҥо (2017 с.) Азия боруонса призерунан буолар. Бастакы хапсыһыытыгар Кытай тустуугун илиилээх-атахтаах оҥорботоҕо — 10:0 ахсаанынан баһыйа туппута.
Онтон тэбиэһирэн буолуо, япон киирдэ киирээт ахсааны 6:0 оҥоро оҕуста. Бастакы түһүмэх бүтүүтүгэр эрэ Айаал 4 очукуону ыһыгыннарбыта. Дьэ онтон иккис түһүмэххэ саха бөҕөһө аһыллан тустан, 85 сөкүүндэ иһигэр 12 очукуону ылан, көрсүһүүнү болдьоҕун иннинэ түмүктээтэ.
Финал чиэппэригэр Айаалы утары Армения тустууга Леван Берианидзе таҕыста. Бу иннинэ Берианидзе Сослав Гаглоевы (Словакия) кытта тустуохтааҕа. Ол эрээри, утарылаһааччыта көбүөргэ тахсыбатаҕынан, быһа кыайыыны суруммута. Онон Айаал улаханнык тириппэтэх-хоруппатах утарылаһааччытын кытта атаҕын эчэйиитэ бэргээн, доҕолоҥнуу сылдьан тустарга күһэлиннэ. Ол үрдүнэн Айаал Армения бөҕөһүн кытта тэҥҥэ кэриэтэ кииристэ, 4:1 ахсаанынан баһыйтарда.
Леван Берианидзе финал аҥарыгар Гено Петриашвилига (Грузия) хотторон, Айаалбытын салгыы тустар быраабыттан матарда.
Быһа түһэн эттэххэ, Гено Петриашвили бу ыйааһыҥҥа аан дойду чөмпүйүөнүнэн буолла. Туроктар кыһыл көмүс мэтээли ылыа диэн бүк эрэммит Таха Акгюллара иккис миэстэнэн дуоһуйда. Ник Гвядзовски (АХШ), Леван Берианидзе (Армения) үһүс миэстэлэргэ таҕыстылар.
Роман Попов, «Саха сирэ» хаһыат