Дьокуускайга доруобуйаларыгар хааччахтаах оҕолору чөлүгэр түһэрэр киин (Оҕо реабилитационнай киинэ) тутуллан бүтэн эрэр. Былаан быһыытынан, ахсынньыга үлэҕэ киириэхтээх.
Бу киин кэмигэр үлэҕэ киирдэҕинэ, 2018 сылга үс тыһыынча кэриҥэ инбэлиит оҕо эмтэнэн, доруобуйаны чөлүгэр түһэрии өҥөтүнэн туһаныахтаах. Инникитин хабыллар оҕо ахсаанын өссө элбэтэр сорук турар. Холобур, 2019 сылга эмтэммит оҕо ахсаана 3,5 тыһыынчаҕа тэҥнэһиэ.
Киин сытар стационардаах, диагностикалыыр, методическай уонна сүрүннүүр салаалардаах буолар. Медицинскэй-социальнай реабилитация, психологическай-педагогическай көмө салаалара, информационнай-методическай ресурснай киин үлэлиэхтэрэ. Утуйар, көрдөрөр куорпуһу таһынан остолобуой, гостиница, массыыналар кыһыҥҥы турар сирдэрэ уонна сылгылар турар туспа дьиэлэрэ баар буолуоҕа. Медиктэр киин иһинэн иппотерапияҕа (сылгыны кытары алтыһыннаран эмтээһин) дьарык ыытар былааннаахтар.
Истибэт уонна куһаҕаннык истэр, саҥарар, ньиэрбэлэригэр кэһиилээх оҕолору эмтиир, чөлүгэр түһэрэр киин Нерюнгрига эрэ баар буолан, төрөппүттэр урут уустуктары көрсөр этилэр. Холобур, оҕо кулгааҕар эпэрээссийэ оҥоһуллубутун кэннэ, өр кэмнээх эмтэнии, чөлүгэр түһэрэр процедуралар наадалар. Онон ыраах барбакка, Дьокуускайга олорон эрэн эмтэнэр кыах үөскээн, төрөппүттэр үөрүүлэрэ муҥура суох.
Ону тэҥэ, киин 100 куойкалаах уопсай дьиэлээх буолар. Манна инбэлиит оҕолордоох төрөппүттэргэ араас өҥө, көмө оҥоһуллуо: сүбэ-ама биэрии, үөрэтии, психолог, юрист өҥөтө. Оҕо ыалдьар буоллаҕына, төрөппүттэр ханна баран, хайдах эмтэтэри, тугу гынары билбэккэ, тула холоруктаан хаалар түбэлтэлэрэ элбэх. Оттон манна кэлэн, медицинскэй көмөнү таһынан, социальнай, педагогическай, о.д.а. өҥөнү ылаллара бары өттүнэн табыгастаах.
Кииҥҥэ күнүскү өттүгэр 150 оҕо эмтэнэр, дьарыктанар кыахтаах.
Ыспыраапка:
2017 сыл саҥатыгар өрөспүүбүлүкэҕэ 10 тыһыынчаттан тахса доруобуйаларыгар хааччахтаах оҕо олорор. Ол иһигэр инбэлиит оҕо ахсаана — 6054. Балартан 28 %-нара (1742 оҕо) Дьокуускайга олороллор.
Ангелина Васильева, “Саха сирэ” хаһыат, edersaas.ru