Биэс сылтан бэттэх «Саюри» хампаанньа Дьокуускай куорат олохтоохторун сибиэһэй оҕуруот аһынан хааччыйан абыраата. Куорат үгүс маҕаһыыннарыгар сарсыарда атыыга кэлэн баран, эбиэккэ диэри тута бүтэн хаалар. Сыаната даҕаны оннук-айылаах ыарахан буолбатах.
Бу күннэргэ РФ бэрэсидьиэнигэр Уһук Илин боломуочуйалаах бэрэстэбиитэлэ — вице-премьер Юрий Трутнев салайар дэлэгээссийэтэ Саха сиригэр үлэлээн барда. Ол чэрчитинэн, РФ Уһук Илини уонна арктиканы сайыннарыыга миниистирэ Алексей Чекунков «Саюри» хампаанньа үлэтин кытта билистэ.
Санатар буоллахха, «Саюри» «Саха сирэ» диэн территориялары урутаан сайыннарыы резиденинэн буолан, Саха сирэ Японияны кытта бииргэ утумнаахтык үлэлээбитин түмүгэр, кыһыннары үлэлиир тэпилииссэлэр тутуллубуттара. Бастакы 0,1 гектар иэннээх тэпилииссэ 2016 сыллаахха тутуллан үлэҕэ киирбитэ. Салгыы 2019 сыллаахха муус устарга 1,2 гектар иэннээх иккис тэпилииссэ тутуллан үлэлээн барбыта. Үһүс уочарат икки түһүмэхтээх. Бастакы түһүмэҕэ былырыын балаҕан ыйыгар үлэҕэ киирбитэ.
Билигин тэпилииссэлэр күн аайы 3-5 туонна сибиэһэй оҕуруот аһын биэрэллэр. Хампаанньа итинэн эрэ тохтуур былаана суох. Ол курдук, бу сыл ахсынньытыгар 1,2 гектар иэннээх алта блоктаах тэпилииссэ үлэтин саҕалыаҕа. Онон хампаанньа сылга 2,3 тыһ. туонна оҕуруот аһын үүннэрэн, Дьокуускайга эрэ буолбакка, улуустары кытары хааччыйыаҕа. Итини тэҥэ, «Саюрига» күөх үүнээйини сэргэ, клубникалары үүннэриинэн дьарыктанан эрэллэр.
«Лабораторияҕа анал чинчийии түмүгүнэн, биһиги үүннэрэр оҕуруоппут астара үрдүк хаачыстыбалаахтар. Биһиги үүнээйилэрбитин көрөр-истэр технологиятын сыл аайы саҥардан иһэбит, натуральнай уоҕурдууну эрэ туһанабыт. Экологическай өттүнэн ыраас бородууксуйабытын Дьокуускай куоракка баар оҕо саадтара ылаллар», – диэн хампаанньа генеральнай дириэктэрэ Сергей Балнайтис быһааран биэрдэ.
РФ Бэрэсидьиэнигэр Уһук Илин боломуочуйалаах бэрэстэбиитэлэ — вице-премьер Юрий Трутнев эрдэ Уһук Илиҥҥи уокурук социальнай-экэнэмиичэскэй сайдыытын боппуруостарын көрөр бырабыыталыстыба хамыыһыйатын президиумун мунньаҕар «Саюри» хампаанньаны өйүүргэ, ол эбэтэр тэпилииссэлэри кэҥэтэргэ сөптөөх болҕомто ууруллуоҕа диэн эппитэ.
edersaas.ru