Агростартап: Саха сирин фермердэрэ граны ылаары биисинэс-былаан көмүскүүллэр
“Агростартап” гранын субсидия көрүҥүнэн ылар туһугар биисинэс-былааннары көмүскээһин саҕаланна.
Граннар бааһынай (фермер) хаһаайыстыбатын тэрийиигэ уонна сайыннарыыга туһуланаллар. Бу бырагырааманы олоххо киллэриигэ быйыл 59,8 мөл солкуобай көрүллүөҕэ, итинтэн 33 мөл солкуобайа – федеральнай бүддьүөттэн.
Агрограннар куонкурустарыгар быйыл 125 сайаапка киирбитэ. Биисинэс-былааннары көмүскээһин бу икки күн устата барар. Бу нэдиэлэ бүтүүтэ түмүк тахсыаҕа.
Кыайыылаахтар судаарыстыба 6 мөл солк. диэри өйөбүлүн ылыахтара, ол хаһаайыстыбаларын сайдыытын хайысхатыттан тутулуктаах.
Бу бырагыраама 2019 сылтан үлэлиир. Үс сыл устата грант өйөбүлүнэн Саха сирин 113 фермерэ бааһынай фермерскэй хаһаайыстыбаларын тэрийэр уонна сайыннарар кыахтанылар.
“Агростартап” бырайыагын олоххо киллэрии тыа сирин өйүүргэ олус суолталаах. Саха сирин Ил Дархана Айсен Николаев бу бырайыагы кэҥэтиини өйөөн турар. Ил Дархан фермерскэй хаһаайыстыбаны тэрийиэн баҕалаах тыа сирин олохтоохторугар сүбэ-ама биэриэххэ наадатын ыйбыта. “Маннык үлэ улуустар уонна нэһилиэктэр дьаһалталарын таһымыгар ыытыллыахтаах”, — диэн бэлиэтээбитэ Айсен Николаев.
Куонкурус “Дьоҕус уонна орто урбаан уонна биирдэм урбаанньыттар көҕүлээһинэрин өйөөһүн” национальнай бырайыак “Фермердэри өйүүр тиһик уонна тыа сирин кэпэрээссийэтин сайыннарыы” регионнааҕы бырагыраама чэрчитинэн ыытыллар.
Саха сирин Тыатын хаһаайыстыбатын министиэристибэтин пресс-сулууспатын иһитиннэриитинэн, бу өйөбүлгэ граны ылар түгэннэригэр бааһынай-фермер хаһаайыстыбатын (КФХ) регистрациялатарга бэлэм уона 2022 сылга арыллыбыт бааһынай-фермерскэй хаһаайыстыбалар тиксиэхтэрин сөп.
Ылбыт үптэрин тыа хаһаайыстыбатын сүөһүтүн-аһын, тиэхиньикэтин, оҥорон таһаарыыга уонна тыа хаһаайыстыбатын бородууксуйатын астааһыҥҥа-үөллээһиҥҥэ оборудованиены, сир учаастагын ылыахтарын, производственнай эбийиэктэрин инженернэй ситимҥэ холбонуохтарын уо.д.а. сөп.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: ТХМ пресс-сулууспата